貝迪斯谷底反彈博得過

猪拉多纳

05/11/2011
文： 鄭少偉

近幾年西甲感覺上都係皇家馬德里同巴塞隆拿兩隊玩晒！其他球隊爭到第三已經係最大成就，想異軍突起一啲都唔容易！今季季初係威係勢嘅貝迪斯，今晚西甲主場對住暴發戶馬拉加， 兩隊波踢法夠放又肯攻，就算場波開凌晨3點咁夜都要捧場，「亨利」就力撐主場出擊嘅貝迪斯，1.92倍平手盤抵捧。




（now632、660台周日凌晨3:00直播）


黑仔貝迪斯贏形勢輸波


雖然計實力，「亨利」覺得貝迪斯同馬拉加都有力「衝三」，不過兩隊近況就認真麻麻。先講主隊貝迪斯，季初4連勝加上娛樂性踢法，唔少朋友都對佢哋寄予厚望，整鬼佢哋近6場全部輸鬼晒，正一有頭威、無尾陣。所謂長路有盡時，點衰都唔會一路輸落去啩？




事關睇番貝迪斯近幾場比賽，好多場都係贏形勢輸波，好似上場作客桑坦德又中楣、又中柱，真係黑到冇朋友。相信貝迪斯教頭美爾都要諗諗計，除咗苦練射門之外，可能要叫班球員「做嘢」轉吓運至得！小弟本身就冇特別信仰，不過前輩教落拜得神多自有神庇佑，同埋可以試吓拎舊肥豬肉，去捽吓主場兩邊龍門嘅門柱同門楣，等佢唔會阻住你入波喎！諗番轉頭，旺角場重開前我都有咁做呀，靈唔靈？我梗係覺得好靈啦！哈！哈！美爾教練，諗諗佢啦！


馬拉加雷聲大雨點小


今場作客嘅馬拉加，有冇貝迪斯咁黑我就唔知，但肯定「有貨」過貝迪斯多多聲，可惜任佢哋季前點樣大灑金錢擴軍，表現始終仲係雷聲大、雨點小，上場如果唔係有主場之利，可唔可以險勝愛斯賓奴終止4連敗，真係好難講喇！




既然貝迪斯有主場之利，不如就博佢哋今場可以成功反彈，平手盤「亨利」會撐貝迪斯；同我打對台想捧馬拉加嘅朋友，都係等佢哋主場出擊先啦！