羅馬客勝手到「拿」來

猪拉多纳

05/11/2011
文： 查里阿蛋

小妹早幾年喺大學讀中史，知道每個王朝都係由革命推翻同建立；今季羅馬喺意甲嘅改革暫時未見成績，但相信只係新兵太多磨合需時，今晚作客護級分子路華拿，一於撐多次新羅馬帝國建造者安歷基，捧1.95倍客W！




（開賽時間：周日凌晨3:45）


托迪唔踢得仲好


羅馬今季請咗前巴塞B隊教頭安歷基領軍之餘，又重金收購唔少西甲新星如保贊、奧斯華度、加高等等，加上具分量嘅比真歷同史基倫堡，球迷自然期望安歷基可以即刻將羅馬改造成「意甲巴塞」。不過小妹就覺得球迷要畀多啲耐性，俗語都有話「羅馬非一天建成」，依家羅馬每場首發陣容有一半係新兵，絕對需要多啲時間磨合，上仗即使喺主場輸畀AC米蘭亦有2球進帳，表現唔失禮。今次作客路華拿，相信係反底好時機！




依家「王子」托迪嘅角色就好似各個朝代嘅守舊大臣咁，曾經有好大貢獻，但係勢力太強反而阻住新政推行。雖然托迪已經復操，好彩今仗仲未出得，對於球隊嚟講絕對係好事。路華拿今季作客暫時只贏過頹爆兼打少個嘅國米，羅馬絕對夠料贏呢隊護級分子。