祖雲達斯11月例發威

猪拉多纳

06/11/2011
文： 巨高

於意大利都靈市，十一月被球迷稱之為祖雲達斯月(Mese de Juve)，主要原因係祖雲達斯喺十一月一日創立。而球迷仲諗咗好多另類關係，比如祖雲達斯標誌性人物迪比亞路於十一月出世、鄰近嘅阿爾卑斯山脈於十一月開始有雪落。或者球員真係畀十一月效應所影響，當月成績都特別好。遠嘅唔好講，上季祖雲達斯喺十一月保持聯賽不敗。而周一凌晨祖雲達斯作客拿玻里，亦係「斑馬兵團」喺十一月首場比賽。相信十一月效應為球隊帶來正面刺激，祖雲達斯受讓平半可揀下盤。




（now 633周一凌晨3時45分直播）




精品旗艦店開張場面熱鬧




既然十一月對祖雲達斯有特殊意義，球隊亦揀喺本月四日為球隊嘅精品旗艦店搞開張儀式。當日除咗有球隊高層剪綵及發言之外，教練干迪及現役球員都有去撐場，場面相當之熱鬧。而同日捷克球星尼維特，更為球隊首度開辦嘅場內觀光團作導遊，氹到班粉絲鬼咁開心。




查實祖雲達斯自更換管理班底之後，不斷向外拓展市場以增加收入，喺商業策略及營銷手法方面，確比其他意甲球隊更見積極。話得說回頭，若非受過電話門醜聞衝擊，被罰降班，今日祖雲達斯未必會有咁大變化。


拿玻里搏完歐聯攰爆


除營運模式之外，球隊本身亦有好大改變，好似胡仙歷、維達爾、派路及列治史迪拿嘅加盟，令到祖雲達斯戰力大幅提升，今季能保持聯賽不敗，絕對係新改革帶來嘅成果。對手拿玻里上周中歐聯作客與拜仁慕尼黑搏足九十分鐘，球員頻撲休息時間有限，對於發揮會有一定影響。今次仲要向不敗球隊祖雲達斯讓平半，下盤都幾抵玩。