張育生活得很精彩

猪拉多纳

06/11/2011
文： 黃興桂

今日Peter唔同大家講歐洲足球，主題係「活在足球已過去的日子：前職業球員的當今故事！」足球喺Peter同好多認識嘅朋友眼中已經不在乎贏輸同名成利就，更重要係當中嘅精神同意義！喺香港踢波謀生一向冇保障，球員生涯短暫，冇周詳退休計劃嘅球員，即使當弗時幾好波，都有唔少晚景坎坷例子，當然亦有未獲上天眷顧者，不斷同殘酷命運奮戰嘅個案。




Peter想同大家講吓球技、品格兼優嘅昔日球員，喺球員生涯結束後釜底抽薪嘅感人奮鬥故事。今日先講我18年前喺荃灣執教過，技術出色嘅進攻中場張育生，相信唔少球迷都記得，佢93年効力快譯通時，喺一場熱身賽中不幸畀對手聲控通野蠻外援韋靴斯嚴重撞傷，導致身體癱瘓，被迫退出球壇，好多人都以為佢餘生要坐喺輪椅度過，不過最近Peter同佢重遇茶敍，雖然佢左邊身體仲要拐杖幫助平衡，但無論身材同面色都充滿健康氣息，令人敬佩。


咬着牙默默打拚


張育生重傷後未有怨天尤人，盡力堅持做物理治療和各方面的身體鍛煉，現時除咗喺大口環任兼職，幫助智障人士復康訓練外，亦積極進修電腦，咬着牙為未來默默打拚，Peter不禁為佢鼓掌，佢嘅精神至係Peter最想同大家分享嘅地方。




記得美國體壇傳媒人好鍾意講：「When the going gets tough！The toughs get going！」強者生存，弱者自毀！即使環境變得更壞，都可以積極自強，扭轉命運。呢一句說話，Peter認為永遠係金句中嘅金句。




獨一無二「金句王」，現職有線足球評述員，擁躉眾多。見多識廣、笑看人生，我行我素畀波風格，喺省港澳極受歡迎。