泥地指數低 唔放好蝕底

猪拉多纳

　　啱啱上期賽事，算係少數唔係點爆嘅周末賽期，總算比較多熱門跑得好，雖然，幾匹熱門「鄉村活力」、「好利佳」、「好好機會」、「首飾達寶」統統冇P，起碼，冇再之前一期周末賽期咁，幾千蚊嘅連贏，一場接一場咁跑出，算係不幸中之大幸。

　　剛戰3場泥地賽，唔放冇命！唔係講得誇張，或者因為場地指數唔夠9嘅關係，不論，1200米、一哩及1800米，總之，短途又好、長途又好，唔擺前走，根本冇得追，「金瑞」放番嚟贏、「好得意」放入三甲，而最典型例子肯定係「拼勁」，向來得個快字，入到直路頭例斷，但今場竟然可帶到尾咁滯，唔係場地利放，仲會係咩？！他日如果再遇到類似場地指數，臨場揀馬心態定要即時調節，唔理好醜，肯放就夠。

巫斯義表現有進

　　另外，當日喜見巫斯義有「進步」，佢喺第六場坐騎「精彩生輝」，雖然只得季軍，如果唔係最後一程，佢肯騎到尾，可能第三名會畀「海南花梨」攞咗。唔知係咪之前被罰款嘅影響，抑或做番足本分，總之，佢係1位騎得之人，表現出專業精神，絕對係馬迷之福。

馬會賽馬節目主持　洪禮賢