小英軍捱細界 殘陣難炒冰島U21

猪拉多纳

10/11/2011
文： 樂比堅尼

歐國盃外圍賽生死戰前，香港時間周五凌晨先嚟U21歐國盃外圍賽熱身，重頭戲第8組英格蘭U21主場對冰島U21，今次英格蘭幼獅點兵係近期最弱一次，因為部分受傷缺陣，有啲則被抽調到大國腳及U19幫拖，面對上屆打入過決賽周嘅冰島，大細中位數去到3.5球，建議捧細盤。（now 671周五凌晨3時30分直播）


英格蘭U21近年喺歐洲橫行，主要原因係佢哋成名甚早，大部分有英超經驗，甚至已打響名堂，對住其他球隊嘅新丁自然綽綽有餘，英格蘭U21目前喺第8組3戰3勝領先，當中包括上月作客大勝冰島三比○，今仗被人睇高一線好正常。

被「師兄弟」抽調主力

不過，今次英格蘭U21人腳不整，唔計長抖嘅韋舒亞、域咸，馬菲比格斯等四名球員分別因傷退隊，另外韋碧克、菲爾鍾斯、魯迪維爾及基爾獲加「升呢」踢大國腳，愛華頓新星巴克里及利物浦後衞法拿根則要「降呢」踢U19，作為廚師嘅U21領隊皮雅斯，只能夠執啲餸頭餸尾，希望餐飯唔好太難食！


睇番今次英格蘭U21嘅陣容，可以話非常新嫩，除利物浦中場佐敦軒達臣及維拉後備前鋒迪爾科尼素擁有過十頂U21喼帽外，其他都甚少替U21上陣，默契及合作性成疑。反觀冰島雖然喺外圍賽成績麻麻，但話晒上屆外圍賽曾力壓德國出線，勝在活力十足，殘陣嘅英格蘭要贏波唔容易，小勝已經算執到咯，捧細啱數！