波斯尼亞核爆葡軍

猪拉多纳

11/11/2011

歐洲國家盃外圍賽四場附加賽首回合今晚上演，八支國家施展渾身解數，爭取最後四個決賽周席位。當中重頭戲，波斯尼亞主場對葡萄牙，如果計牌面同名氣，葡萄牙贏幾條街，但球隊自保羅賓圖接手後，不斷傳出負面新聞，加上波斯尼亞近年進步神速，「新核彈頭」迪斯高托弗，今仗又出埋陰招對付敵軍，葡萄牙首回合作客唔敢輕舉妄動，葡萄牙讓平半，樂比仔捧下盤。（now 632及660台周六凌晨3時直播）


可能有人會覺得，明年決賽周唔係冇葡萄牙吓嘛，但呢個世界冇話冇邊個唔得，正如上屆歐國盃亦冇英格蘭，即使葡萄牙真係出唔到線，亦唔係啲咩稀奇嘅事，如果葡萄牙真係咁強嘅話，上個月就唔使作客輸畀丹麥，將小組首名拱手相讓啦！

葡萄牙C朗孤掌難鳴

樂比仔對葡萄牙呢支球隊一向冇乜好感，佢哋唯一優勢就係擁有C朗呢位天王巨星，但觀乎佢喺國家隊嘅表現，同踢皇馬時確實有一段距離，而且班球員夾咗咁多年，都唔見有咩隊形，進攻時畀人感覺係各自為戰，好似C朗、拿尼都鍾意靠自己硬闖，敵方守衞好易防守。


葡萄牙致命傷係領隊保羅賓圖欠缺領袖才能，自佢接手後，不斷傳出將帥不和嘅傳聞，卡維奴、保辛華退隊只係冰山一角，其實好多球員都對呢位教頭不滿，只係佢哋以國家隊利益為大前提，又或者敢怒不敢言，樂比仔可以好肯定咁講，葡萄牙陣營內士氣極差，喺呢場咁關鍵嘅賽事，未能上下一心實在好輸蝕。

波斯尼亞「軟草」制敵

近年冒起嘅波斯尼亞，世界排名已升至二十一位，迪斯高、伊比斯域都處於職業生涯嘅高峰，近期入波當食生菜，其他球員名氣雖然唔大，但勝在夠齊心同有紀律，故踢起嚟相當機動。波斯尼亞今屆外圍賽五場主場贏咗四場，今場仲特登搵咗個草地超軟嘅球場對付葡萄牙，葡萄牙向歐洲足協投訴亦不果，波斯尼亞絕對有條件喺今場爆冷！