克羅地亞翻轉土耳其

猪拉多纳

11/11/2011
文： Mic少

歐國盃外圍賽附加賽首回合，土耳其主場對克羅地亞，兩隊上屆決賽周八強碰面，今次又要喺生死戰交手，可謂冤家路窄。相比三年前，克羅地亞實力更勝從前，反觀土耳其一直動盪不安，已經歷三次換帥，連「神奇主帥」希丁克都未能為球隊帶來蛻變，冇本錢讓波，捧受讓平半嘅克羅地亞下盤。（周六凌晨3時05分開賽）


土耳其上屆歐國盃憑互射十二碼淘汰克羅地亞，打入四強，但該國足運從此走下坡，國家隊成績直線下滑，現任主帥希丁克已經係球隊近兩年第三位領隊。即使由呢位名帥領軍，球隊表現亦乏善可陳，喺今屆外圍賽十戰只得十七分，比榜首球隊德國少十三分，如非同組其他對手太不濟，恐怕土耳其未必可以次名取得附加賽資格。

土耳其受假波影響水準大跌

土耳其水準不斷下滑，好大程度上因為國內聯賽備受假波問題打擊，球員普遍欠缺榮辱感，最大鑊係國家隊靠土炮支撐大局，昔日主將咸美艾天托普喺皇馬長居後備，雪到僵硬。球隊最大希望放喺馬體會中場阿達杜蘭身上，但始終獨力難支，要擊敗克羅地亞，並不容易。


克羅地亞近五年一直由比歷執教，球隊已有一套慣用戰術，球員一上陣就知點踢。最重要係克軍主將近況當弗，尤其係熱刺中場莫迪歷及多蒙特新星比列錫，都係能傳善射嘅創造型球員，往往令對手防不勝防。克羅地亞今屆外圍賽勝出率達七成，受讓相當抵玩。