國足焗攻大出血

猪拉多纳

11/11/2011
文： Mic少

世界盃外圍賽亞洲區A組，中國遠赴多哈，惡鬥改以該卡塔爾首都為主場嘅伊拉克，國足上月主場不敵伊軍後，出線形勢告急，若然今仗無法全取三分，恐怕難以翻身，總教練甘馬曹計劃變陣，改踢雙箭頭進攻陣式，孤注一擲求殺出條血路，但國足防線不穩，勉強主攻隨時得不償失，預料屆時應不乏入球，可博2.45倍入球大。


（廣東體育周五晚10時15分直播）


因為伊拉克上次主場比賽安排混亂，被國際足協處罰，今輪主場移師鄰國卡塔爾首都多哈舉行，其實咁做對伊軍更有利，因為陣中有多位主將効力卡塔爾球會，包括射手尤尼斯，免卻回國舟車勞頓之餘，亦可安心比賽，應會有更佳發揮。伊軍領隊薛高係巴西名宿，崇尚森巴足球，既然上次作客都可以擊敗中國，今次有地利，自然更心雄，力爭再贏多一鋪鞏固出線地位，相信伊拉克踢法會傾向進取。


每組只有首兩名可以晉級下一圈，中國現時落後榜首約旦六分，少次席伊拉克三分，餘下三輪已無失分空間。總教練甘馬曹已準備豁出去一搏，近日操練棄用四五一陣式，改用四四二，用雙箭頭郜林及韓鵬攻堅，亦要求球員加快行軍速度，搶攻意圖明顯。

中門大開益對手

不過中國最大死穴係防線，後防傷兵問題嚴重，只有趙鵬及李瑋峰兩位正宗中堅可用，但趙鵬剛傷愈不久，李瑋峰水準無復當年勇，不時犯下嚴重錯誤，實難予人信心。加上國足今仗焗攻之下，後防或會出現更多空位畀對手。從呢個形勢推斷，有利創造更多入球。