波斯尼亞 咬「牙」切齒復仇

猪拉多纳

11/11/2011
文： 享格比利

今個周末係國際賽天下，但戲肉始終係今晚展開嘅4場歐國盃附加賽。8支國家隊透過兩回合賽事爭奪4個決賽周席位，最終肯定有人歡喜有人愁。你話如果C朗冇份踢決賽周，肯定係畢生遺憾；奇兵愛沙尼亞決心踩入歐國盃揚名立萬，迪斯高同莫迪歷等幾位星級戰將亦要為爭搭決賽周尾班車搏老命，生死戰今晚一觸即發！


4場歐國盃附加賽當中，以頭場波斯尼亞火併葡萄牙最有睇頭，兩大風頭躉C朗同迪斯高勢成為呢場「南非世盃附加賽翻版戰」嘅焦點。率先喺主場出擊嘅波斯尼亞雖然防線不整，但領隊蘇錫堅持要搶攻搏3分，對住雷聲大雨點小嘅葡萄牙似乎有計先拔頭籌，受讓平半要1.98倍下盤。（now632及660台、中央5台周六凌晨3:00直播）

射手迪斯高弗爆

兩年前雙方喺南非世盃外附加賽交手，結果葡萄牙總比數贏2:0粉碎波斯尼亞嘅世盃夢，如今又再狹路相逢，波斯尼亞當然想一雪前恥，爭取首次亮相大型賽事決賽周。波斯尼亞右翼衞穆迪薩受傷退隊，彭迪沙同柏巴斯亦要坐波監，雖然一下子冇晒3位後防主力，但主帥蘇錫前日受訪時就話次回合造訪里斯本預咗惡踢，今晚絕對唔接受和波收場，老虎蟹都要死攻。陣中「矮腳虎」比真歷近4場為羅馬披甲嘅賽事都交出助攻，配合埋今季大熟大勇嘅射手迪斯高、米斯莫域同伊比斯域等戰將，夠晒本錢大打進攻足球。

場地曳唔利葡萄牙

葡萄牙陣容無疑係星光熠熠，單係C朗足以令世上任何守將聞風喪膽，但大軍喺分組賽嘅表現毫無說服力，主場對冰島都要失3球，最後一輪仲輸畀丹麥斷送首名出線資格，證明葡萄牙喺關鍵戰役往往跌Watt。右閘保辛華日前宣布無限期退出國家隊嚴重影響軍心，中場丹尼艾維斯亦因膝傷退隊，前線無論普斯迪加抑或曉高艾美達都信唔過。


賽前葡萄牙足總派官員視察過場地，發現自從附加賽抽籤結果出爐後，波斯尼亞嘅比連奴普積球場草面情況愈嚟愈曳，姑勿論係咪波斯尼亞搞鬼，對葡萄牙嘅地面組織肯定有影響，造訪波斯尼亞隨時又失威。