伊拉克上盤靠得住

猪拉多纳

11/11/2011

唔通連個天都唔鍾意甘馬曹？伊拉克今晚喺世盃亞洲區外圍賽A組再遇國足，讓平半值得再追，兩隊上個月碰頭伊拉克贏1:0，由於國足形勢上非勝不可，據講教頭甘馬曹打算擺大個頭用雙箭頭搶攻，弊在後防不斷出現傷兵，竟然要搵物理治療師客串至湊夠人踢分隊賽，咁搞法點捧得過？


（廣東體育周五晚10:15直播）


基於安全考慮，伊拉克唔能夠喺主場作賽，今場喺中立場卡塔爾多哈上演，加上後衞阿巴斯上場領紅牌要停賽，失去地利又陣容不整，表面睇伊拉克似乎未必讓得起。不過咁，伊斯蘭教好重視嘅宰牲節剛啱過咗，據講伊拉克打算再次打沉國足，奠定出線基礎作為節慶禮物，鬥心肯定爆棚。

國足搵物理治療師客串練波

伊拉克現以6分排第2位，相反得3分嘅國足就慘喇！由於杜威同馮瀟霆因傷冇入選，張琳芃同苑維瑋唔係正宗中堅，搞到中堅位置唔夠人，日前操練，國足教頭甘馬曹甚至要嗌來自西班牙嘅物理治療師客串，至能夠勉強湊夠腳踢分隊賽。

甘馬曹焗攻牙煙

如無意外，未完全康復嘅趙鵬、或者好番冇耐嘅張琳芃今場要頂硬上，夥拍操練撞爆鼻嘅隊長李瑋峰合組「傷中堅」，帶傷上陣已經牙煙，更慘係面對非勝不可嘅壓力，甘馬曹打算派郜林同韓鵬同時上陣空襲對手，大家知啦！國足前線把握力向來唔高，依家焗住搶攻，一個唔覺意後防隨時又畀人搞掂，受讓都要唔過。