金鎸龍華二班橫行

猪拉多纳

　　第九場三班1600米。「紅山茶」距離成熟仍有一大段距離，但話唔定脾性係咁，成世冇得改，如果仲有改善空間，殺上一班唔係幻想。從今季兩場賽事，臨場及賽事中，情緒慢慢改到啲，初出未跑已忟晒，仲影響埋出閘，而沿路在後仍跟得唔順，去到直路就慣例論論盡盡先踩行油（也曾被困）。上賽再跑1400米可補中，但唔代表全程冇跑錯，至少見佢前中段喺馬林唔自在，途中又曾經慢車，而喺出彎後依然鈍鈍哋咁慢慢加速。

　　由於上賽中段有慢腳嘅走勢，或是今仗加程主因，可唔可以即刻適應？唔跑唔知，但如再跑1400米則可能出現追唔切鏡頭，兩害取其輕，改跑到1600米係好事；以上賽取勝姿態，本身喺三班根本係過客，只要賽事尾段唔係莫氣，打叠再W。

　　第十場二班1200米。「金鎸龍華」昨朝大跑道走過，冇咩睇到，成隻馬好享受而輕鬆咁跳咗兩段，狀態有冇大進？真係唔覺，但佢文靜得嚟又唔覺係死牯牯。而上賽贏得好易，仲要騎者「賣大包」，全程只係諗住走生位，而冇考慮到蝕幾多腳程，喺三叠兼早發力之下，㩒住贏「皇帝法令」成個馬位，可以咁誇張，留喺二班冇有怕。

馬會賽馬節目主持　洪禮賢