鋼志銀飛龍超級精神共同目標 甜將新希望甜橙齊歡笑

猪拉多纳

　　之前兩期田草A欄賽事，普遍不利前置馬，如果今日唔係有雨，相信模式唔應該有大變。騎師方面，韋達柏寶兩大巨頭固然惡馬唔少，不過，潘頓亦有幾多坐騎有機會，會係另一股勢力。

重心場次　第8場　第一班（105-80分）1400米草地

　　「甜將」休息半年多復出即入P，唔係直路喺中檔困咗一輪，好大機會有Q，但負重及劣勢下，仍可在高水平場合有好成績，進度、實力、近況已證明晒。熱身後回到與「勁飛寶」互有勝負嘅1400米，只要13檔唔令白德民發揮錯晒，贏面幾大。

　　剛一Q返嘅「齊歡笑」及「甜橙」，級數及能力，要在今場入圍唔難，前駒係擔心排檔而已。「新希望」愈贏愈犀利，跑高半班亦唔怕。「伽羅」上賽有拖，表現比預期仲要好，但轉場及轉埋對手，已不易再偷襲。「超皇鷹」大致已跑盡，評分嫌高。「禮尚往來」加程啱，惜對手強，邊線腳。

第1場　第五班（40-10分） 1200米泥地

　　「小飛俠」試夠3個大閘至跑，以吳廐嚟講，簡直係罕見，而喺最近兩閘，試得愈嚟愈討好，除非跑落係另一回事，若不，應會跑得好好睇睇。

　　「嘻哈大少」及「厲行星」，近況維持到，泥地性能要博。「電訊新星」操咗好耐至跑，或因進度緩慢，不過，月初泥閘末段有反應，稍有進展，希望四降五班幫到。此外，「好精彩」及「兵奇臨」，冷門可吼。

第2場　第四班（60-40分） 1200米草地

　　「名馬」上場多少係受惠前中段拖得慢，唔算太有證明，而負重能力喺今場亦要考驗。「清風駒」排番好位，唔使好似上賽留得太後，發揮會更理想。

　　「嘉綵」一再喺大閘考驗追勢，真真正正試好晒，初出已具上名資格。「利駿」、「安瑪」排外檔，恐早段太落後，直路追唔切。「芙蓉之寶」同父馬初出上名率高，而連同外地，試過4次大閘，冇1次唔喺前面返嚟，早熟應會早用。

第3場　第四班（60-40分） 1600米草地

　　「好食德」應該轉咗性能，嘗試跑此程，會比留喺1400米實際，總之，上季贏得「氣定神閒」、「最著數」，一旦重新搵番方向，四班負重也不怕。

　　「足智多謀」能拍住「紅跑車」喺直路追入Q，上賽又再證明多啲。「得力助手」跑至季內第4仗，賽前工夫投放多咗，而上賽受困仍肯追，估計今場會是目標。「明旺」漸漸失信心，不過，唔排除回到此程會變身，因前仗被阻後，最後百幾米仍湧得幾勁。「京城三寶」搏失後縮程，難估練者心態。

第4場　第四班（60-40分）1400米草地

　　「鋼志」回到長直路，如有正常偏快步速配合，以佢嘅後勁，唔會有邊匹對手夠佢爆。「銀飛龍」和「超級精神」，剛仗增程至1400米，跑得冇預期咁好，唯一解釋係初跑，希望吸收經驗後會唔同。

　　「翔龍」剛賽跑啱但冇P，係實力不夠？路程不合？今仗加配件會有更深了解。「共同目標」初出已揀，按理此程仲好追。「松風」係擔心不利放，其實上賽前已做番好多工夫，明顯已走出低迷期。

第5場　第三班（80-60分）1650米泥地

　　「齊喝采」及「漸信良駒」，在泥地中程級數值班頂水平，如計跑法則以後駒較安心。「逸逸友福」初跑泥地在外叠蝕仍有P，場地性能有晒證明，相信轉至一哩幫助大。

　　「成就美麗」冇咗前仗同程嘅內檔形勢，難靠。「聖迪達」和「喜威寶」，近仗失望，充其量爭腳。「玉峽生輝」比上季贏同程低幾分，而上賽前冇大手做嘢，末段仍衝得好，今場操練稍為執正啲，又肯加程，可能有意思郁手。

第6場　第三班（80-60分）1400米草地

　　「勁力」季內兩場，騎師與隻馬自己都出錯，先至一再冇P，今仗出動柏寶，排檔唔係太曳，係咪高估佢能力，今仗揭盅。「幸運雄威」唔鍾意上場前中段放得過快，仲保到P算叻，希望換人有更理想效果。

　　「城市之都」揀開又贏開，梗會跟多場。「高一線」唔係一再缺課，純以實力及轉倉概念，根本應該行頭。「快利多」有足夠步速的話，末段佢會有番段追吓。「香檳歲月」9檔視乎早段泊到咩位，如果又似上場，限三三四四。

第7場　第三班（80-60分）1200米草地

　　「洪福齊來」初出入Q，壓到嘅季殿軍，近期贏晒，有晒指標，而今仗重戴眼罩，更覺有決心。「華美之星」14檔及初插三班，唔係冇隱憂，過熱只宜作配。

　　「夢幻十一」轉田草效用如何，上賽已見識到，而升班負輕磅，根本唔怕。「閃耀之星」終於跑田草，究竟之前跑得好嘅谷草賽事，係咪唔係實力指標，今場會揭曉。「紅運福星」1檔及負磅唔重，機會應比前略好，邊線馬。

第9場　第三班（80-60分）1600米草地

　　「紅山茶」初出陣上犯錯多，上賽已見改善唔少，持續進步令佢喺三班擴大優勢，而上賽中段曾突然慢腳，或許加程會更合性能。

　　「太平星」係擔心馬房手法，計實力要揀。「財運」目前未進步到三班夠贏，不過，今仗檔位及跑法，或令競爭力提升。「紅跑車」當打，用小何又抵消加磅，拖住。「精奇」和「榮進蜜運」，如有利追，當可受益。

第10場　第二班（100-80分）1200米草地

　　「金鎸龍華」太勁，但跑埋今場好大可能要加程。「紅旗勇將」與前駒有十幾磅差距，點都拉近多少實力距離。

　　「皇帝法令」3檔夾跑法，擺前走，睇吓放到去邊。「牛精大師」重返此程會比角逐1400米合適。「金獅名將」勝後仍然好銳，不過，轉田草對手已唔同晒。餘駒之中，「奇葩」與「陽明好好」，買TF可拖埋。

馬會賽馬節目主持　洪禮賢