保地「客W」呼聲「高」

猪拉多纳

13/11/2011
文： 郭球奇

華斯高同保地花高聽朝清晨將合演里約熱內盧超級打吡，本來華斯高有主場之利，點知賽會最後因保安理由，將呢場波改喺保地花高主場進行，即時勝算大減，加上近年交手冇優勢，呢場保地花高主場出擊受讓1球，梗係捧1.45倍「讓球客勝」啦！（開賽時間：周一清晨5:00）


華斯高 Vs 保地花高


巴甲仲有五輪就煞科，目前爭標形勢激烈，未計尋晚戰果，頭六位球隊只相差5分，今晚「二佬」華斯高鬥「四弟」保地花高，兩隊為搶分追榜首哥連泰斯肯定搏命，更何況兩隊仲係里約熱內盧死敵，戰況肯定更加激烈。


警防騷亂華斯高失地利


本來華斯高今晚應該主場出擊，不過球奇賽前收到風，當地警方以安全為由，擔心華斯高喺聖真里奧球場上演呢場打吡會引發騷亂，結果勒令佢哋要移師去保地花高嘅阿維蘭熱球場舉行，無端端變咗作客，肯定影響賽前部署。雖然華斯高日前喺南球盃大勝秘魯體育大學晉級，但體力付出亦甚大，加上中場祖馬同菲臘比佐治有傷，今晚都未必趕得切復出，仲讓波認真牙煙。




保地花高上周喺前列大戰主場0:1不敵費古倫斯，但今晚對住華斯高有權反彈，事關近排一直受右腳膝傷困擾嘅射手艾傑臣，話自己已百分百傷愈今晚會復出，呢位前鋒近期極速上位，傳聞AC都想搵佢代卡斯辛奴。而且保地花高又話前鋒艾比奧幫烏拉圭踢完尋日朝場世盃後立即歸隊，今晚可以披甲，火力有晒保證，何況佢哋近5次對住華斯高又未輸過，今場坐和望贏啦！