地頭唔衰得撐富山勝利劏綠雉

猪拉多纳

13/11/2011
文： 九叔

富山勝利 Vs 岡山綠雉


今日嗰3場日乙真係好蝦人玩，因為唔設降班，幾支中下游球隊輸都冇所謂。但係人要面樹要皮，啲主場出擊嘅點都會搏啲，所以富山勝利迎戰岡山綠雉場波，不妨博吓個1.9倍主W。（開賽時間：周日下午3:00）


查實以日本仔個足球系統，係有條件連日乙都設立降班制度嘅，連南韓職業聯賽出年都設立升降制，盡量減少假波嘅誘因，日職冇理由唔識咁諗，奇怪在佢哋似乎仲未有呢個計劃，於是日乙到咗呢啲衝線階段，咪頻頻有啲隨時跣你一鑊嘅無謂波囉。


雖然勝負無關痛癢，不過由足智彩對今日3場日乙波嘅態度去睇，明顯睇好富山勝利主場贏得，個1.9倍主勝熱過唔少同行，自然亦低過平均賠率，大家唔怕小注跟一跟。


查實富山今季打咗34場聯賽只贏過10場，同個隊名勝利唔係咁有緣。好彩排第17位嘅對手岡山係日乙失球第二多（56球）嘅渣嘢，今日仲要有中場石原崇兆、小林優希幾件停賽同養傷，主要得一件中場西野誠受傷休息嘅富山，有機會劏咗隻綠雉進吓補。