巴西誓炒埃及省招牌

猪拉多纳

14/11/2011
文： 亨格比利

2014世盃主辦國巴西又騷哥利！「森巴兵」今晚將會喺卡塔爾中立場同埃及拍跳，巴西上周五喺大爛地輕取加蓬，不過主帥文奴文尼斯就埋怨贏得唔夠多，今鋪更承諾派遣更多猛將出擊，希望大勝省番靚個招牌，對住點兵古靈精怪嘅埃及，梗係捧2.1倍「讓球主勝」啦！（開賽時間：周二凌晨1:00）




上周五巴西造訪加蓬贏2:0，當地新建嘅國家體育場又停電又地爛，真係得啖笑，難怪連巴西《環球報》都睇唔過眼，寸個場連100萬歐元都唔值。對住加蓬只係贏得兩粒，Fans當然唔收貨啦，領隊文奴文尼斯賽後賴地爛，為保面子今晚唔炒埃及點得呀？


多哈靚場啱晒地面推進


「森巴兵團」前日抵達多哈作輕鬆操練，據文奴文尼斯所講，對加蓬一戰嘅後備兵包括丹尼爾、堤亞高施華同盧卡斯等一線球星都會復任正選，戰鬥力點計都比上仗派出7位新仔嘅陣容強，況且卡塔爾多哈球場出名靚，照計有利巴西地面推進。




埃及呢邊有新帥巴特利領軍，本身亨格比利都幾欣賞呢位前美國教頭，但今次就覺得佢點兵勁無厘頭。經驗豐富嘅攻擊中場阿布捷卡意外落選，巴特利解釋話想畀多啲機會班後生仔，點知佢就call咗36歲嘅隊長阿密特哈辛同38歲嘅門將艾哈達利入伍，咁咪同佢所講嘅前後矛盾囉！


埃及新帥點兵古靈精怪


當中以艾哈達利入選最令人「O嘴」，呢位問題球員早排缺席所屬球隊艾美列克操練之餘，仲老屈會方拖佢糧，卒之就畀蘇丹足總罰停賽，紀律咁曳仲揀得落手，真係唔明巴特利諗乜。仲有喎，新季埃及聯賽5戰入3球嘅沙基，因為骨盤受傷，日前已聯同左閘艾度沙菲齊齊退隊，陣中最有卡士嗰件前鋒穆罕默德施丹喺多蒙特又係坐多過踢，上月中先接掌埃及嘅巴特利又未摸熟隊波，今仗想輸少球都難！


橫數千軍


巴西近5次對賽贏晒

‧對上5次遇埃及全勝，當中有4次開大。

‧近7場國際賽只有1仗食白果。

埃及近6戰4次開大

‧對上4場國際賽全部開半場和。

‧近6場比賽有4仗開入球大，當中錄得3勝1和2負。