健康精英有欄醒

猪拉多纳

　　谷草B欄C彎賽事，跑道偏差會大到點？阿棟冇有怕，大不了買少次，但臨場提供貼士係職責。咁究竟今期利放？利追？有時幾難估，奉勸今晚有心「劈」嘅馬友，都係睇清楚環境先好擺銀落去，盡量喺頭三兩場賽事了解多啲，先好擬定之後場次嘅策略。

　　第一場第五班1650米。望清楚今場參賽馬，好多都係揀唔上手，因為有半數馬以上，季內跑過而未嘗上名，賽事水準低到咁，「威水福星」點都算係有根據，話晒季內識贏先！而排11檔亦唔使擔心，只要早段順利帶出，有望一如前仗般，一口氣放到。

　　第二場第四班1000米。「健康精英」唔會係好超級嘅馬，不過，上仗入Q卻係進步表現，現時佢嘅速度喺四班，已經好有競爭力，以及本身跑姿同樣有改善。今仗返嚟谷草，本來有啲唔鍾意，好在2檔起步，會教埋隻馬點跑，如果佢放得出，貼到欄走得順，按上賽段段有跑法，轉到短直路其實仲易捱到尾。

　　吉利大師賺形勢

　　第七場第三班1200米。「吉利大師」跨季贏兩場谷草1200米，蹄下敗將有唔少硬嘢，如上季「紅旗勇將」、今季「多多昇」等，如果指佢有機會贏埋二班賽，一啲都唔覺有咩出奇，更認為係正常預測而已。而度過今場形勢，唔少快馬排中外檔，或令佢哋早段走多咗，如果扯得快，此駒後勁咁犀利，仲唔係佢嘅世界。

點買法

　　今晚兩匹排好檔位嘅馬「健康精英」和「吉利大師」較為喜歡，但賠率略為乏味，如果嫌熱的話，就唔好博W，一於用嚟做QT膽，可能撞到啲冷腳，乘埋就過癮嘞。

資深評馬人　陳華棟