搶盃最耍家鹿島「勝利」在望

猪拉多纳

16/11/2011
文： 自由恒

今日雖然有22場波咁多，但實質就只係得兩項賽事選擇，一係就6點鐘開波嘅日本天皇盃第3圈，一係就要等到第二朝嘅巴甲賽事，巴西波得番4輪，冠軍同自由盃資格之爭仍然激烈，冇乜邊場係例行公事，不過戰果已經冇季中咁正路，個人覺得今日投X重心應該係天皇盃。

富山勝利上圈靠互射12碼晉級

睇番近6屆嘅天皇盃，冠軍都係名牌，浦和紅鑽、鹿島鹿角同埋大阪飛腳各贏兩屆，加上冠軍可以取得來屆亞冠盃參賽資格，相信最終盟主都係熟口熟面。事實上今屆亦未見有太大冷門，上圈就只得3支日職球隊未能喺法定時間內贏波，其餘絕大多數大炒晉級，冇必要刻意扒冷。


由於本圈撞正國際賽期，都要睇番實力分子會唔會有主力被抽走，衞冕冠軍鹿島鹿角都算好彩，竟然冇人要踢太公波，只得守將西大伍坐波監，都算係強陣出擊。佢哋今季聯賽成績麻麻，殺入前3機會唔大，要踢來年亞冠盃，爭取天皇盃係唯一出路，好彩佢哋盃賽戰績相當靠得住，今年已經先捧走日聯盃，今仗對住上圈要靠互射12碼晉級嘅富山勝利，唔難大炒開出1.52倍「讓球主勝」。


（開賽時間：周三晚6:00）