百利拍檔不老英雄善風高明威威

猪拉多纳

　　今晚快活谷B欄賽事，會唔會繼續利外叠冚，模式一如23/10嗰期，定係好似舊時一樣，好位及擺前走着數？真係要跑過至知。韋達及柏寶在剛賽夾埋冇1W，成績令人O咀，今期兩人各有熱辣辣坐騎，希望唔會又令我哋一殼眼淚。

重心場次　第7場　第三班（85-60分）1200米

　　「吉利大師」連贏兩場此程，末段過馬姿態勁，帳面只加兩磅，而對手唔覺比上賽叻得去邊，倘步速正常，大有機會再W。

　　「新力飛」初出混在中游，場地及際遇令佢跑唔出水準，但見沿路肯聽騎師指揮，再冇上季過促及亂「片」毛病，絕對係進步表現，今仗轉番草地，隨時變身。「賀喜」評分落到有利水平，而上賽在不利內欄追得好，如果係復甦先兆，今仗應有更理想成績交出。

　　「點石成金」上賽已認為要增程，係就係贏得易，不過，對手唔係叻，兼時間唔算快，要再進步先夠贏，拖腳則唔反對。「魔幻大師」排12檔但今場冇乜快馬，而剛仗佢喺頭兩段輕易造出差唔多二班時間，轉回谷草可能仲好放。再揀落去可留意近況唔錯嘅「爪皇盛水」。

第1場　第五班（40-10分） 1650米

　　「大東海」落班即做嘢，賽前拍夠4課，係季內最認真1場，似有吼準今場意圖，用埋柏寶更似樣，如果跑得番3仗前四班輸近水準，已夠入圍。

　　「燈胆寶」又係另一有級數之馬，情況與前駒近似，又係賽前大手準備，估計開氣後末段貫注會比上賽強得多。

　　「飛天龍駒」上一哩係正確方向，換人及重戴配備亦啱。「無敵福星」明明暑後大隻咗，但跑落唔覺有進，不妨睇埋今場除晒配件至「分手」。「天子駕六」谷草短直路一樣掂，如步速快仲啱。「威水福星」和「恭喜發財」，TF腳可考慮。

第2場　第四班（60-40分） 1000米

　　「喜萬家」最後試跑走過夠「行」，今仗有番好位，如跑出前仗殿軍水準，已夠入三甲。「健康精英」2檔有利攞埋欄，應該唔似初出跑得咁肉酸。

　　「火燎腚」9檔或尷尬，要睇與前駒如何互動。「田園名駒」近仗冇走勢，主因係外叠蝕唔起，今仗7檔及縮程，若早段楔得好，未必唔可以翻身。「好妙星」勝在有態，級數則較低。

第3場　第四班（60-40分） 1650米

　　「大將軍」前前後後試過晒，估計排2檔會採守好位跑法，或者最啱佢。雖則隻馬走規已改善唔少，但早課仲係成日郁身郁勢，嚴格講，仍未夠專心及成熟，可爭而已。「神勇馬車」賽前拍跳，醒神過之前兩場，確認大致跑夠，今賽或有更佳成績。

　　「進攻足球」谷草性能好懷疑，不過，均速跑法應該啱，希望換人有轉機。「桂花飄香」上賽前已覺晨課漸由沉寂轉好中，不過，出賽喺早段喪走，先會大敗，敗後轉人、轉場，而賽前唔係冇工夫配合，小心。「新三刀王」近況可靠，惜實力普通，爭腳。

第4場　第四班（60-40分） 1200米

　　「樂融融」贏同程時間普通，過程卻輕易，只要有番類似上賽環境，佢嘅後勁仍然派用場。「大地王者」上季同期曾在此程入Q，當時前中段步速拖得慢，佢有本事蝕位飛出大外檔殺上，賽績好實淨，而今賽之前安排跑田草，其實部署一如上季，更覺今次轉場唔係冇譜。

　　「精英勇士」與「金獅駿將」，屬於有得爭而難贏之流。「金財子」除眼罩，如不失前速並能放鬆，可能放得到。

第5場　第四班（60-40分） 1800米

　　「百利拍檔」暑後冇大閘，初出一哩竟可後上入Q，證明上季尾贏馬水準唔係差，今仗特登加程，如果睇上賽末段勢頭，跑長百幾米，隨時仲犀利。「不老英雄」復課唔似有疲倦感覺，仲可能頂得住。

　　「善風」前仗先揀完，回谷草此程，效果更勝一哩。「高明威威」跑到冇P，上場係失望，希望係未夠跑頭而已，畀埋今次機會。「錢程萬里」腳傷後3日復課，唔會太大問題，而跑法及性能皆可靠，邊線馬。

第6場　第三班（80-60分）1200米

　　「友瑩果」能在初跑谷草下，與「紅旗勇將」串Q，至少值三班頂實力。「多多昇」硬係覺得分盡，但連場上名，靠銳氣。

　　「特好」唔夠弗，不過，3季以來，熱身後嗰場例上名。「馬風雲」初出有揀，跑落因冇新鮮感，已不易在短途突襲。「祥勝愛駒」上仗初出冇大閘，操練又一疏再疏，跑到獎金名次的確有驚喜，值得跟進。

第8場　第三班（80-60分） 1800米

　　「國中之星」三班此程中堅，一直保持高度上名率，終於報得今場，有備而來，賠率抵博。「馬主光輝」及「財駿福星」一對弗開、剛在同程埋Q之馬，正路之選。

　　「安穩」負磅與上場不一樣，雖然仍有好位，多少打折扣。「好旺財」有基本狀態及路合，惟目前63分，未必貿然郁手。「私家路」一次過減好多磅，此類方廐新勝馬唔敢睇小。