凱沙蓄銳謀利

猪拉多纳

18/11/2011
文： 蘇斯黑柴

德甲獨腳戲凱沙羅頓主場鬥利華古遜，利華近期狀態欠佳，球隊受國際賽影響亦較主隊嚴重，加上有歐聯後顧之憂，今晚作客仲要讓平半信唔過，黑柴捧進步中嘅凱沙羅頓下盤。（有線61及201台周六凌晨3時30分直播）




利華國腳多，國際賽日對佢哋影響較大，左閘卡特歷啱啱為捷克喺歐國盃外圍賽賣命，中堅奧馬托柏克亦首次為土耳其上陣，作客對克羅地亞搏足全場，箭頭戴迪約克流感啱啱好番亦要為瑞士喺友賽中踢足九十分鐘，另外路菲斯、拿斯賓達、賓特尼奴同尼高拉佐真遜都啱啱踢完國際賽歸隊，備戰同體能難免受到影響。


利華有歐聯後顧之憂


利華今季失去老帥軒歷基斯同上季最佳球員維達爾後，整體實力已不如前，球隊要兼顧歐聯賽事亦顯得吃力，近期狀態同成績都好一般，近七場正式賽事只贏兩仗，上輪聯賽主場對下游球隊漢堡領先兩球都被追和，加上下周中又有主場對車路士嘅歐聯關鍵戰，今晚相信好難集中精神搏殺。




凱沙今季放走多名攻擊主力，換血後起用多名新人，季初成績欠佳，不過會方喺最困難時刻同少帥古斯續約，軍心穩定下球隊戰績開始穩步上揚，近四場聯賽兩勝兩和保持不敗，上仗作客賽和賀芬咸仲佔盡上風，國際賽對佢哋影響甚微，只有射手高文夏返國為喀麥隆比賽較重要，正因為陣中國腳唔多，國際賽期可以畀到古斯更多時間磨合新舊球員，上月國際賽日後，佢哋就曾經爆冷作客贏史浩克04，今次仲趁空檔期同盧森堡國家隊拍跳，備戰積極，主場受讓有一捧價值。