豐衣足食勝在忠心

猪拉多纳

　　第九場第三班1400米。如果場地受天氣影響，可能會令部分實力馬失利；又如果前中段步速比正常偏慢，一大堆後上馬將會陷於不利狀態。所以，上述兩點，會係跑出兩批唔同嘅馬成因。

　　今場仍然喜歡「豐衣足食」，係就係年幾未贏過，經常做二奶，但唔係有乜「依郁」的話，佢係匹忠心度極高之馬。其實上賽人馬已跑出100%水準，只係遇到匹之後贏埋二班嘅「新希望」，唔夠鬥冇得好講。既然復課仍認真準備，倘能繼續保持，又唔係畀慢步速拖累，有望贏番場。

　　第十場第二班1600米。「續領風騷」上季3歲已評100分，近季例子唔多，早年「天久」係其中之一，而該駒第2季可以喺級際賽也文也武，「續領風騷」亦會有同等能力。

　　就算唔喺比較角度去衡量，佢喺上季頭兩仗先與「傾力之城」埋Q，翌仗贏到現評105分「家樂飛」，絕對係指標。但「續領風騷」多跑幾場，連1P都冇，唔多似真。而經過熱身後，今仗肯增程，以及用番主帥，只要場地唔係慢，應該會有番強者本色。

馬會賽馬節目主持　洪禮賢