曼聯四面楚歌小勝格

猪拉多纳

19/11/2011
文： Wendy

曼聯今晚會作客升班馬史雲斯，今年三隊升班馬依家全部排晒喺中游，咪當佢哋係「魚腩」，現時史雲斯仲要主場不敗，呢場「紅魔鬼」想大勝真係有難度喎。




（有線300及200台周日凌晨1時30分直播）




當然，曼聯要追趕有三十一分嘅曼城，依家得廿六分排第二嘅「紅魔鬼」就一分都唔失得啦，加上排第三緊隨其後嘅紐卡素亦只係少一分咋，但搏得英超嘅又要保留兵力踢下周歐聯喎，似乎可以用「四面楚歌」嚟形容我愛隊。




今晚最有期待嘅，唔使講一定係呢兩周好得閒嘅朗尼啦，除咗佢多數以正選上陣之外，其餘位置用咩人好難估計，「費蛇」大概唔會為呢場波傾巢而出喇！曼聯過去作客亦唔多開出大勝，就算上季攞聯賽冠軍，作客都只係坐和望小勝格局（上季作客5勝10和4負），所以今晚都似小勝。


史雲斯主場不敗受考驗


史雲斯呢隊升班馬踢咗十一場排喺第十，主場仲要不敗，真係唔敢睇低佢哋。不過，今季到訪過自由球場嘅五隊球隊之中，排名最高嘅都只係依家第十二位嘅史篤城，唔怪得主場戰績咁靚啦，睇埋今晚對曼聯先至考驗到佢哋個場係咪真係咁自由！




上一輪聯賽，史雲斯作客對住利物浦守和0比0，門將禾姆仲抽水話覺得「利記」好似得蘇亞雷斯一個識踢波，好囂張啊，今晚會出場嘅「小魔鬼」，唔該同我教訓呢個多嘴龍門！

想睇曼聯可唔可以破史雲斯主場不敗之身，但係又冇買開「英超」月費計劃嘅朋友，呢個禮拜開始，可試一試我哋有線新推出嘅「英超按日自選服務」。收費逐日計，你鍾意睇邊日就買邊日，真係好方便啊！

Wendy推介：曼聯 勝

熱愛舞蹈的Wendy，2004年歐國盃Euro Babe變身成為有線球彩台節目主持，當初對足球猶如混沌初開，依家已滾瓜爛熟，最愛暢談波經。

phone波熱線：1831 678

電郵：soccer64@cabletv.com.hk

「超級星期六」開放時間：晚上10:00至凌晨3:30