皇馬殺氣勁 打殘蝙蝠兵

猪拉多纳

19/11/2011
文： 鄭少偉

經過上星期國際賽之後，「亨利」最愛嘅西甲終於返嚟喇！仲要一返嚟就有好戲上演，今晚「蝙蝠兵」華倫西亞會喺主場迎戰「一哥」皇家馬德里，論近況兩隊波都堅到不得了，預期呢場前列大戰會相當精彩，就算夜少少要捱眼瞓都唔可以錯過啦！今場「亨利」對皇馬作客贏波好有信心，讓半一都要捧。




（now632及660台周日清晨5:00直播）


C朗有傷照搏殺


現時西甲榜首皇馬今季氣勢如虹，近10場波連埋歐聯全部贏晒，喺聯賽以3分騎住死敵巴塞，班擁躉就梗係高興到不得了啦！難得可以唔使活喺巴塞之下，想重奪西甲錦標，當然要盡量搶分，就算今場對住屬於爭霸分子嘅華倫，皇馬一班球星都一定當決賽咁踢！




雖然有朋友同「亨利」提出過，話皇馬陣中粒粒皆星，全隊都係國腳咁滯，會唔會因為踢完太公波影響今場嘅發揮？「亨利」唔排除呢個可能性，但諗深一層，班主力入邊除咗C朗同法比奧干查奧，為葡萄牙踢歐國盃附加賽要搏老命外，其餘嘅西班牙同德國國腳都只係踢熱身賽，相對體能消耗唔會好大，大家可以放心。雖然有消息話C朗有輕傷在身，喺今場都堅持上陣搏殺，皇馬班球星戰意有幾濃大家可以想像啦！


華倫遇剋星冇運行


主隊華倫冇錯戰績係唔曳，但其實好多場贏波過程都唔算好清脆，好似上一輪對利雲特咁，就係靠對方後衞查維雲達擺烏龍，同門將送大禮先贏到2:0，今場仲有冇得「食運」呢？冇得估喎！不過睇番華倫近2季遇親皇馬就好似撞到剋星咁，完全冇運行，信賽績今場自然要撐皇馬啦！


橫數千軍


華倫交手少入波

‧近10戰5勝3和2負，只得3場保持清白。

‧近8次交手2勝6負，有3場吞蛋。

皇馬10連勝多士哥

‧近10戰全勝，有8場入3球或以上。

‧莫連奴以往4次率隊對華倫錄3勝1和。