紐卡素冇包袱玩「大」佢

猪拉多纳

19/11/2011
文： 江忠德

雖然紐卡素依家咁勁，仲有人估佢哋有冇份踢來屆歐聯，計我話倒不如提早宣布「喜鵲」護級成功仲實際，家陣夠分打好底冇後顧之憂，作客曼城照攻可也，入多幾球益觀眾啦。




紐卡素呢支東北部球會一向崇尚傳統英式足球，不過今季充滿法國風情，反而用地波短傳入滲，球員又唔錫身，季前做足備戰工夫等開咧，所以好快入局，對住中下游球隊過關斬將，又趁兵工廠同熱刺時運低摸和，突然間山雞變鳳凰，成隊波依家仲係好陶醉，一於玩「大」佢！


紅軍訪車仔踢爭氣波


當然對手曼城連贏8場亦唔講得笑，雖然之前有兩輪國家隊比賽，下周中亦有歐聯大戰跟尾，但係勝在板櫈深度夠，喺主場搶攻勒唔住，尤其係幾個前鋒弗到漏油，紐卡素想唔失波都難。




至於聽晚車路士大戰利物浦，賽前各方消息都係不利紅軍，「哨牙蘇」被起訴種族歧視，隊長謝拉特又受到傷患困擾，不過經驗話畀大家知，利物浦愈係畀人睇死，就愈搏甩髀，況且車仔亦唔好得幾多，喺史丹福橋主場隨時陷於苦戰。