幸運紀錄 柏住再上

猪拉多纳

　　呢期谷賽有啲兵荒馬亂之感，唔係冇心水刨到，但一睇騎師王隔晚賠率有啲唔係好對路，嘩，有成4位騎師唔夠10倍（另有4位十餘倍），而當中韋達係3倍幾、柏寶5倍， 就更令人「心寒」，賠率咁筍唔係好現象，睇嚟爆冷危機四伏，希望唔好畀阿棟開口中。

　　第二場四班1650米。「回鄉精神」直路唔打得鞭，硬性規定，洗濕咗個頭，惟有繼續落去，當然，對隻馬發揮有冇影響，大家心中有數，阿棟唔使喺度多講，不過，另方面，都爾唔打鞭已漸漸成習慣，鞍上要如何處理，可能已有另一套完善手法。同時，今賽對手略不如上賽，如好好把握機會，騎練有望打破守齋多時悶局。

　　第四場四班1200米。「幸運紀錄」轉到苗廐喺同程大勝而回，末段見柏寶打咗幾鞭，即刻拋開對手3個身位返嚟，完全唔同班，轉倉後轉變之大，馬友們自己有眼見。今仗留在四班跑，加至131磅，負重能力係點？唔跑過唔知，諗深一層，如果阿苗擔心，大可用小將，佢再用柏寶，應該有一定信心，有決心爭連捷。

　　第七場二班1650米。「蓬萊仙子」一哩路程專家，跑三場冠亞季各一，表現十分穩定，亦因為呢點，今仗再戰此程，已表明再拼心態。當然，如計評分的話，其實佢差唔多到頂，問心嗰句，跑埋今場，仲追唔追，真係兩睇嘞，好在今場好位而形勢夾，一於捧多次。

點買法

　　今晚提供3匹重心馬中係對「幸運紀錄」有信心，唔係話其餘兩匹唔贏得，機會點都比前駒遜色，所以買單W算嘞。QT精選揀第七場，「蓬萊仙子」咁準可作膽，腳拖幾匹正路馬如２　８　９　１２。

陳華棟　資深評馬人