未有馬贏 支持不減 郭能坐騎抵玩

猪拉多纳

　　目前在騎師榜末幾位，贏不足5場頭馬有王志偉、都爾、湯智傑、卓利、賴維銘，上述幾人中之王志偉及湯智傑，今季個頭開得唔錯，往後要繼續交出成績，未必會有問題。而都爾長期拍住華廐，個馬房積弱，佢自然身受其害，冇得好講。卓利則唔明點解今季各廐對佢支持度銳減，真係唔知當中有咩問題？！反而賴維銘係較令筆者感意外，又唔係唔騎得，又唔會經常性惹飛，呢類騎師應該被練者受落，但迄今得1W，嘥咗佢！

　　而排到最後其實仲有郭能，不過，佢嚟咗冇耐，只係跑了3期，暫時未有1匹馬入到三甲，成績唔係好，出場機會卻多，共騎了14匹馬。而今期仍然幾多練馬師支持，可能人夾人緣啩！今晚8場賽事，有6駒上陣，而其中3駒仲係路程專家，可能帶挈到佢攞好成績。

　　郭能今晚手上「精密紡」、「沙紙」及「鵬力洋洋」，統統係路程專家，前兩駒屬姚廐，我都知排檔唔好，喺12及8檔，喺C欄隨時渣都冇，但兩駒入Q率高得很，有賠率，打水片都要啦。

　　而「鵬力洋洋」係大告嘅馬，佢一直大力支持郭能，呢晚三匹配郭能馬之中，應以呢匹最有機會，又係嗰句，路有專長之馬，賠率卻高水，點解唔幫襯。

Jack