洪禮賢講馬:唔講大話 只有爆煲

猪拉多纳

        常言道，數據係唔會講大話（只有爆煲），信與不信，人人唔同立場，冇話係咪死硬派，冇得監人一定要企喺同一立場。而現今賽馬世界太多資訊，有唔少數據累積咗出嚟，信邊瓣？其實好難一口咬定，惟有揸定宗旨，唔好一時信東，一時信西便可。
        
        講開數據，日前谷中賽事，高廐「南陽望族」大熱W咗，連同此馬在內，此廐季內5匹大熱門，未有1匹唔入三甲（2冠1亞2季），證明賠率熱，確與機會掛鉤，當然，目前基數未算多，只能概括而論，但係呢位倉主季內真係改造到唔少馬，總之，啲出賽馬熱唔熱都好，已經係一股新勢力。
        
        當晚做直播節目時，亦講過伍廐季內谷草新勝馬，再出成就止於季軍，結果「豹顯神駒」及「辣得喜」俱三甲不入，但先旨聲明，唔覺係練者鬥志或功力問題，因洪某已經講過幾百次，此廐上季可在兵源少情況下，交出若干頭馬，絕對係能人所不能（今季仲堅，勝出率暫為各廐之冠），所以，今季未有谷草頭馬打叠贏，只係1個現象啫。
        
        順帶一提，另有1個現象幾得意，賽事接近跑了3個月，胡廐到依家仲未有1匹王牌馬有Q（31駒得2季），真係幾嚇人。