確叻迅 1定抵博

猪拉多纳

　　第十場二班1000米。「風火神駒」今季初出唔上名，由於置身級際賽，早段又走得急咗（幾駒齊放，比標準時間快幾線），去到最後階段力弱好正常。輸完唔係冇做野，一路操住嚟唞，早前試大閘亦好輕鬆咁贏，唔覺進度有咩問題，亦因為儲番足體力，以及連降兩班，預期威力會重現（歷年來相隔約兩個月或以上跑了5場，交出2W1P）。倘重磅唔係影響到好多，又能夠跑出去季一班同程贏「科研精英」時水平，揸住56.09秒賽績喺今場，真係睇唔到有邊匹對手可以埋到身。

　　第十一場三班1400米。一望落去，3匹里程新嘅馬「紅旗勇將」、「吉利大師」及「精彩日子」，好似鼎足而立，唔多覺有其他對手有資格爭取勝利，好大可能呢場賠率會側晒一邊，至於賽果係咪咁？唔敢話三大熱門唔會排住隊返嚟，不過呢類場合博冷正合時宜。

　　正如「確叻迅」，冇乜近績，年半未上過名，又要對住上述3駒，賠率火燒唔熱。由於今仗為4季以內首次落三班跑，可能佔到班利，此外，上賽表現普通，好大責任喺騎者身上（直路揀錯跑線及引致塞車），如果唔係，應該有得衝吓。總之，今場1檔較易留，對佢本身發揮有好大幫助，博得過。

馬會賽馬節目主持　洪禮賢