翔龍吸引韋達有哩

猪拉多纳

　　今期柏寶停賽，會唔會係韋達獨大的日子，真係好難講，而且，部分騎師如巫斯義、杜利萊及白德民手上唔係冇惡馬，未必會比前者威晒。另外，睇過之前兩期共18場田草C欄賽果，幾多熱門馬跑得好（7倍以下贏了12匹），大熱門更達7匹之多，希望今日亦會係咁。

　　第一場第四班1400米。呢場已經好大機會由大熱門馬勝出，只因「超級精神」置身1場類似新馬班賽事，而佢自己跑慣「江湖」，經常喺正常四班組別上陣，與一批舊馬多次交手，單係作賽經驗及路程性能，已經比同場之馬有根據多多聲。再者，隻馬搏極未贏，點會唔想交差，撞啱今場咁普通嘅賽事水準，實會好好把握。

　　第六場第四班1600米。「翔龍」跨季7場仍然未入過三甲，但今場吸引到韋達，梗有原因，好大程度係與近仗追得唔錯有關。而4歲馬漸漸進入穩定期，上賽加眼罩又冇反效果，末段追得似模似樣，到咗今場終於加程並強配，睇嚟立心爭取表現。

　　第九場第一班1400米。「傾力之城」喺今場佔到實力之優，之前一路跑開級際賽，忽然之間由「富貴金龍」及「雄心威龍」等高手，換了一堆一二班馬，賽事水準完全係兩個世界。而主帥白德民，寧願騎佢都唔吼同場新勝「甜將」，如果唔係特登聲東擊西，可能騎師都認為「傾力之城」級數較可取。同時，C欄肯放之馬，點都着數啲。

點買法

　　由於「超級精神」冇肉食，買W冇意義，買Q亦唔慌分得多，倒不如「翔龍」及「傾力之城」呢條W2x3好過，中1隻都保到本有微利嘛！至於重心QT場次揀第九場，２膽拖幾匹降班馬如１２５６。

資深評馬人　陳華棟