柏寶停賽 坐騎益人 安國倫無端端發達

猪拉多纳

　　由今期開始，柏寶連續停賽兩期，對於擁躉嚟講，未必唔係好事，我唔係想清算佢，之不過，近賽佢真係輸多贏少，仲要巧合地好多熱門死火，淨係計11月，佢老哥共有18匹坐騎，被捧成大熱或次熱門，結果贏得兩匹咁大把！「粉絲」點會唔眼光光。

　　而柏寶停賽關係，佢原本好多騎開嘅馬，一一換晒人，部分有機會嘅，更流晒入安國倫手上，真係冷手執個熱煎堆，由於呢類交收可能係一次過貨仔，安國倫有便宜又點會洗頸。此外，佢跑埋今期，自己亦要停賽，呢次一定盡力數胡，贏得就贏。

　　安國倫坐騎「風雲」、「鄉村活力」及「智多飛」，都係喺之前賽事由柏寶跑得好，近績唔係冇，如果全部喺今日贏得晒，呢期柏寶停賽就真係傷，但可能性又唔係冇。

　　「風雲」增程至1400米會比跑短途啱發揮，未必冇本事挑戰勁敵「超級精神」；「鄉村活力」轉回直路賽，既然前仗此程一出即勝，肯加埋眼罩再試，可能即刻跑番好；「智多飛」長途健將回到1800米，一定惡過跑中距離。所以，呢條柏寶停賽W過關，真係諗得過。　

Jack