馬主論戰

猪拉多纳

鷹之團路有專長

　　今日有唔少明星馬上陣，賽事應該會幾好睇。

　　推介第十場「鷹之團」，上場跑1200米輸咗唔使太介懷，今次轉番嚟跑過往七戰獲四冠三亞嘅直路賽，可以交番出應有水準，坐位望贏。

　　另外鍾意尾場「精彩日子」，上場初出跑1400米輕取「自由萬歲」，贏馬過程好似食菜咁食，擺明大把虛分在手，今次揀場85分為上限嘅三班賽報名，真係唔知邊度搵對手，篤定連捷。

張敬山

首飾孖寶一鳴驚人

　　韋達剛啱中三元，搏殺手風真係好順，賭馬最緊要跟紅頂白，今日一於吼實佢手馬。鍾意頭場「首飾孖寶」，同主馬「首飾達寶」上季亦係一出即勝，證明幕後喜歡即食，而呢隻三歲馬亦已經做足晒備戰工夫，有權一鳴驚人。

　　另外推介第六場「翔龍」，季內配梁家俊跑三場都係得個近字，今次終於輪到韋達接手，估計戰鬥力會大幅提升，應該係時候打開勝利之門。

任達華

紅跑車不容忽視

　　杜利萊今日手馬幾惡，我睇好佢有馬贏。推介第八場「綠色寶」，上場初戴眼罩即刻響泥地1200米開齋，五歲馬終於踏入升軌，今次再跑同程，依然由贏馬拍檔杜利萊操刀，人馬默契冇問題，可以再贏一仗。

　　另外鍾意第七場「紅跑車」，之前打叠贏兩場，八歲馬已完全復甦。上場隔幾日匆出都輸唔遠，演出其實唔曳，今次隔兩個星期再上陣，隨時殺個措手不及。

寇鴻萍、梁廷鏘