英雄得勝擺明搏殺

猪拉多纳

        今日沙田十一賽事，好多熱門馬隔晚偏熱，十幾廿蚊獨贏多的是，係咪一命博一命，阿棟冇咩意見，不過，有時賭馬唔係熱就大晒，值唔值博先係真諦，畀你中隻十幾蚊馬又如何，都頂唔到兩場注碼，所以，賭馬除了量力而為，咪盲目捧熱門都係戒條。
        
        第四場五班1400米。「英雄得勝」唔知點解換人騎，係阿滇揀同場「駿盈」，抑或冇得騎此駒，真係唔多清楚。不過，有睇過上場發揮，的確係唔妥善，如果直路唔係屢次受阻，估計成就唔只一席殿軍。今仗用到紀仁安，為乜先？唔通貪賠率熱上熱，有咁嘅安排，梗係想借助佢嘅硬淨騎功幫匹馬出頭，呢場鬥志肯定加零一。
        
        第五場四班1000米。「小宇宙」初出跑第四，唔係唔錯，因為佢由頭鬥到尾，早段走多咗，但拉士仲係幾韌，以初出馬嚟講，已及格有餘。經過一場實戰後，應該喺留放方面掌握得更好，而今場對手唔見得叻過上場，要提升名次並唔會遇到阻力。
        
        第十場二班1400米。「精彩日子」贏完又贏，好似天馬行空一樣，如果依家設定上望空間仲有幾多，其實係冇乜意思，總之，一日未斷纜，亦要尊重。今仗來到二班角逐，其實對手都係平平無奇，冇邊幾匹馬係二班中上級，最叻已經數到「新希望」，其餘嘅好多季內都未有W到手，所以，要喺今場再贏，根本唔會有難度。
        
        
        
        「精彩日子」最多十五蚊，W過關都冇乜肉食，倒不博第四口孖寶，一隻射一隻，「皮」輕而注碼夠集中。而重心場合揀第十場，用匹鋼膽2拖一堆冷門，希望博大霧。