今期陣容似樣 蔡韋大開殺戒

猪拉多纳

        今期田草十一場賽事，有可能係蔡韋組合派糖嘅日子，望落陣容之強，算係近期最似樣一期。雖然好幾匹合作馬嘅賠率可能熱到辣手，最多係十幾廿蚊，勝在贏面好大，炒埋希望有一碟。如無意外，今日會大開殺戒，如果只得1W埋單，肯定好多馬友散場時會哭成淚人！
        
        蔡約翰與韋達合作馬有匹「首飾孖寶」退出，但無損爭勝本錢，由頭場「名舵主」開始，中間又有「和牛」及「精彩遊戲」，再數到尾二嗰場「精彩日子」，匹匹唔係次貨，唔係冇運的話，嚴格嚟講，贏兩場係基本要求。
        
        「名舵主」一出即勝固然唔嘢小，而睇佢比賽時有前有後，更加係難得，唔係重磅拖累，跑長啲仲啱。而「和牛」上場直路塞死咗，真係慘慘慘！其實過終點後佢衝贏晒，所以，睇上場追勁，呢次加程梗係好發揮，有望取得季內首場勝利。
        
        「精彩日子」自然係鎮守尾關鋼膽，上陣兩場贏晒，真係好似冇用過力，究竟隻馬超成點？真係謎一樣，淨係知道今場喺二班依然有極大優勢，獨贏十幾蚊亦在所難免。　Jack