領彩轉場惡

猪拉多纳

　　唔知係咪天氣凍，抑或阿棟心血來潮？！硬係覺得今期賽事唔係咁正路，柏寶坐騎少、韋達喺騎師王熱唔透，好似已經係先兆。同時，個別場次啲熱門馬，有啲唔係咁值得捧場，感覺上係蜀中無大將格局。所以，呢期谷草C欄賽事，大家要三思而後行。

　　第四場四班1650米。「領彩」未跑過谷草，唔係冇機會撞板，不過，樂觀咁諗，轉場的確賺晒級數，話晒前仗田草1600米仲同緊「勁飛揚」埋Q，人哋之後上番三班再執多W，伸算「領彩」四班田草已經超超哋，轉細場咪更惡！而上場成績退步，睇落係騎者跑得過蝕有關。呢場如果發揮恰可，場地又唔係冇得追，有權掃晒。

　　第七場一班1200米。「美猴王」轉到高廐未有起色，唔係新接手練者唔叻，因為上手其實已經養得隻馬好好，亦交出相當理想嘅表現，喺評分高企之下，真係神仙都難變。今次終於等到啱分區返番谷草，仲要對準拿手嘅1200米，擺出一副戰鬥格。如果C欄9檔唔係極為失利，以佢嘅超強谷草實力，跑入三甲係基本要求。

　　第八場三班1650米。「帝豪名駒」今季成績比前穩定得多，5歲馬正值當打之期，呢個浪用得就用，冇理由會收收埋埋。上賽借助戴圖理騎功贏多場，係有僅勝之嫌，由於負磅不加反減，計落未有阻力。如果今場前中段有步速的話，直路佢就有行。

資深評馬人　陳華棟