勁飛駿佳同寶正勁搏得分

猪拉多纳

　　近三期谷草C欄賽事，頭馬集中在內檔，好似之前兩期，有半數來自1至3檔，就算大外檔有馬贏，為數少之又少。

　　望望出馬陣容，冇乜邊個騎練特別出眾，就連騎足8場嘅韋達亦然，呢類場合正正係爆冷溫床。

重心場次　第6場　第三班（85-60分）1200米

　　「勁飛駿」上賽有揀，已指出做齊工夫至出，係咪有分喺手，將會找到答案，結果冇高估到佢，隻馬只係喺最後一程衝咗幾步，輕易彈甩對手贏馬，姿態好有霸氣。如果唔係1場散晒，喺原班可再贏。

　　「搏得分」近仗例爆一段，所耗氣力唔少，喼唔喼到真係要博。「佳同」跑法比前駒機動，排檔亦較好，呢匹新勝馬今仗仍要重視。

　　「寶正勁」上場第3段明顯放得過快，拉士尚頂得住，縮回此程比1400米更有把握。「銘記心頭」草地能力在三班唔超，只係有得跑，借助1檔，睇吓會唔會有接近演出。「聚有盈」檔位及跑法或夾到今場形勢，大冷可敲。

第1場　第四班（60-40分） 1000米

　　「勝在分秒」正如上賽前所言，明明早課唔錯，跑落唔得，難明，但如持續跑得番，目前分數要爭取頭馬唔難。「永同至尊」耐冇跑，復出一役算跑得唔錯，熱身後回到此程仲啱發揮。

　　「皇仁勁駒」剛賽早段守好位，但拉士一步都冇，好失望。「威晒」遇到1場早段夠快場合，後追跑法啱夾。「妙不可言」及「綠色快駒」，論大閘走勢，前駒較討好。

第2場　第五班（40-10分）1650米

　　「大東海」上賽落班前大手做嘢，已指出係季內最認真1場，跑落成績好，證明工夫加壓有效。今仗課期積極性不減，再追。「華麗堡」或可跟隨「金威神童」守貼欄二位，有可能賺晒形勢。後駒如果唔係放得過快，未必只係做電兔，只因落班已鬆綁。

　　「金滿貫」唔係有前兩駒同場，本來有形勢之利。「贏啲啲」刻意唞過，準備重新做番，並縮回一哩，可能有幫助。「康莊大道」及「飛天龍駒」跑落失望，但評分卻已減過籠。

第3場　第四班（65-40分） 1200米

　　「駟馬難追」班次佔利、檔位好、準備又齊，配搭都執正埋，的確係衝着今場而來。「名馬」C欄9檔，仲有冇上賽早段際遇，真係未必，只尊重其近績才拖。

　　「叻叻仔」上季三班同程沿途三叠，返嚟可拍住「吉利大師」跑第五，喺今場夠晒卡士。「多多昇」之前兩季賽績顯示，都係喺落四班第2仗至郁手，加上排咗10檔，唔易處理。「金獅駿將」少有打叠入圍；「雪米糍」級數夠有凸，係要博11檔喺早段攞到咩位。

第4場　第四班（60-40分）1650米

　　「超級精神」經常與班內超級馬串Q，如果唔係谷草性能水皮，爭勝機會大大提高。「輕越直前」1檔兼冇馬放，可能用到自己最佳跑法，有望保持表現。

　　「勝利駿駒」由上賽2檔變了今場C欄10檔，有可能焗住跟前咗，影響整體水準。「魅力心」由中段開始置身不利外叠，最終喺上場1200米一樣輸唔遠，賽績具跟進必要。「領彩」有級數但外檔。「新領袖」準備程序一如上賽前，仍有再搏意圖，希望今賽唔好慢閘，跑到最佳水準。

第5場　第三班（80-60分）1650米

　　「旋風魅力」前仗季內初出路短後上有勢，喺佢前前後後嗰4駒計有「但求勝」、「沙場王子」、「悅璐孖寶」及「佳同」，翌仗交出1冠2亞1季，佢攞個第四名好有指標性。上賽增程因外檔焗放，唔啱馬性，輸近已及格。今仗如遇到正常步速，而佢用到留後衝跑法，有力爭勝。

　　「國中之星」及「雪山神駒」，前駒賺點級數，路程性能則略有不足；後駒分盡，近仗此程卻演出穩。「駕寶」外檔將削弱機會，早段際遇定成敗。

第7場　第一班（115-90分） 1200米

　　「共創未來」及「美猴王」，俱因轉場賺卡士，後駒如非排9檔，應做膽。「大把在手」三季跑十幾場都唔失前四名，賽績點可以唔重視。

　　「飛闖」一班此程贏過「文武維揚」，唔係12檔，本有力挑戰，依家要睇早段騎師點處理？！

　　「好友福」撞正有步速場合，有機會留得順，唔排除初跑谷草即有表現。

第8場　第三班（85-60分） 1650米

　　「點石成金」早於兩仗前已認為有需要加程，終於喺今仗作嘗試，預期能力或會增值。「邦先生」再遇「千江映月」，較看好上賽處理未妥善的前駒。

　　「玉峽生輝」揀開，而贏完冇加磅，仲排1檔，貼多場。「確叻迅」抽好位，谷草一樣掂，冇理由喺三班冇得贏，尤其對手再唔係「精彩日子」。「帝豪名駒」與「威仔皇」TF之選。

馬會賽馬節目主持　洪禮賢