告東尼喜歡攞綵

猪拉多纳

　　有時節日、傳統嘅嘢，覺得有咪有，覺得冇咪冇！而大時大節，對於自己嚟講，經已冇乜意義，譬如聖誕節前後有馬跑，元旦又有馬跑，農曆年初三都有馬跑，因要應付工作，唔會點提得起興趣慶祝，所以，久而久之，自己生日亦唔會特意慶祝（試過連太座生日一樣唔記得）。

　　前幾季例贏馬賀壽

　　之但係，人人對節日睇法有別，以告東尼為例，平安夜出世，根據之前幾季嘅「傳統」，佢經常有預祝或補祝生日嘅安排，而所謂「安排」，做得練馬師，最實際嘅梗係贏馬！

　　太遠嘅唔講，淨係睇番呢幾年，由07年12月26日「牛精富星」計起，再數到之後嗰3年嘅「帝聖名駒」、「歡樂滿堂」、「一定快」、「駿綵」及「歡天喜地」，告東尼俱有補祝生日頭馬出現。既有咁實在嘅「傳統」擺喺眼前，呢期賽事又點可以唔留意東廐馬。

　　今期此廐有8駒上陣，初步比較看好第二場「超綵」。自10月中後冇跑過，或與11月試閘後有痰扯上關係，不過，有痰前後嘅工序冇疏落過，12月中亦試過大閘，唔應該會影響到進度；以佢前仗贏馬及翌仗跑到好蝕仍近嘅賽事水準嚟講，今仗檔好又唔使負重，唔係冇本事贏。

馬會賽馬節目主持　洪禮賢