嘉綵變招出擊

猪拉多纳

　　跑埋今期賽事，直至1月1日先有賽事，阿棟在此謹祝《成報》讀者們年尾最後一期賽事贏到笑、收錢收到手軟。而據我嘅睇法，呢期賽事未必熱門收場，尤其部分草地賽場合，反而3場泥地仲有啲譜。預測有冇偏差，當然跑過至知，但常言道，買馬必先講求值唔值博嘛！有時啲熱門買少隻，又有乜損失噃。

　　第二場四班1200米草地。「嘉綵」上賽初出已經好大「風」，最尾賭到廿幾蚊獨贏，可惜最後「燶」咗。睇佢比賽時走勢，基本上係未熟，「吹」得咁行，梗係諗住質素搭夠，雖然，最終事與願違，亦帶出呢隻馬有心打快攻。輸完1場即刻換人、加配件、轉咇，係改咁多嘢，急用嘅心態好明顯吓！不如就畀多次機會呢匹咁新嘅馬。

　　第六場三班1650米泥地。「財運」今季跑咗咁多場，係喺谷草一哩輸到冇晒影，其餘4場全數喺前列返嚟，雖然係冇運，搏極都未贏，亦反映騎練「的」起心肝想交差。回看上場泥地1800米表現，初跑泥地只係輸最後幾步，但可以頂得住有晒根據「非常好」，呢場Q位水準幾叻。今次縮落一哩或者仲啱，有力一放而返。

　　第七場三班1200米泥地。「巴其利」轉戰泥地即贏，喺此程輕勝而回，二至四名唔算好叻，因為夾雜住「俊威威」、「紅火電駒」，不過，睇佢贏馬過程，要前速有前速，而拉士一樣咁貫注，唔係一般三班馬有咁嘅能耐。只係加8分再戰原班同程，難尋對手。

資深評馬人　陳華棟