上周三贏一件唔夠喉 告東尼補祝生日

猪拉多纳

　　今期賽事係2011年拉士，之後要去到元旦日至會有馬跑，而呢次十場沙田草泥地賽事，邊路人馬要吼實？會唔會又係幾個大馬房／大騎師搞掂晒，跑啲正正路路賽果？但願如此吧！希望年終賽唔好係又爆、唔係又爆。不過，睇過之前兩季年終賽，過百冷W的確唔少，前季淨係頭三場嘅W至少30倍！上季亦有4匹頭馬超過10倍！所以，呢期對熱門馬唔好抱太大期望，反之，博吓冷門可能搵到橫財。

　　至於練馬師陣營，告東尼喺平安夜生日前贏隻「超級精神」，應該未夠喉，今次可能仍有補祝生日出擊行動。老老實實，佢縱有9駒上陣，兵力唔係好省鏡，唔係件件揀手貨，真係考眼光。而估計告東尼或會「分散」出擊，未必倚重蔡明紹一人，所以，其餘非「蔡駒」，一樣要留意。

　　像「超綵」與「美的人生」，唔係冇賠率，卻具有一爭之力。前駒今季贏過此程，幾乎賺到盡至贏得，但大致上，今場形勢及條件差唔多，用得韋達，點會是是但但咁跑。後駒上賽巫斯義跑到被罰，呢場冇理由唔跑得醒醒定定，三班1400米都一再接近，喺四班唔會冇得爭。最後一提，「牛精大師」呢場對住好多近績平平之輩，攞番前仗贏二班嘅賽績出嚟比較，夠入圍有餘。

Jack