馬主論戰

猪拉多纳

電訊超星諗得過

　　今日戰局有啲亂，睇嚟賽果爆冷居多，所以我提供三匹「電訊」系馬畀大家博吓。第二場「電訊超星」，上季輸畀「勁信心」、「自由勝」跑第三，依家減到44分一定有着數，希望贏番一場喇！

　　第四場「電訊高星」係長途馬，今次孭輕磅跑2200米，隨時可以後追一段，咪睇小。第五場「電訊至尊」初戴眼罩上陣，估計可令佢集中精神角逐，話唔定會有突破性演出。

張敬山

財駿福星施回馬槍

　　潘頓剛啱憑「佳同」同「此時此刻」起孖兼捧盃，搏殺手風好順，今次吼實佢啲馬應該冇錯。推介第六場「財駿福星」，季內五戰獲三冠一亞，六歲馬進步好大，只要今場用番後追跑法，隨時可施回馬槍。

　　另外鍾意第七場「飛躍之駒」，上仗除眼罩跑番泥地1200米即刻輕鬆贏馬，一再證明跑泥地威力最強，今次徐雨石安排佢再跑同程，絕對係明智之舉，連捷可期。

任達華

好利佳賽績硬淨

　　蔡約翰今日又派出成手惡馬上陣，預期又會有大攻勢展開，不妨從中揀選捧場對象。

　　推介第三場「好利佳」，上場響谷草1200米跑第三，但實際只係輸條頸畀頭馬「日月暉華」，睇番後駒再出已再贏，證明賽事水準好高，呢隻馬今次移師泥地作賽，隨時贏得。

　　另外鍾意第五場「尊勝福星」，呢隻馬近兩個月已五試大閘，備戰空前積極，蔡廐初出馬向來有保證，有權一鳴驚人。

寇鴻萍、梁廷鏘