銀飛龍加程要追

猪拉多纳

        今日沙田馬場舉行元旦賽事，又一年了，唔認老都唔得。好在自己保持心境開朗，唔會畀啲馬激親，成日笑騎騎，先可以抵擋歲月催人。而阿棟在此向《成報》讀者們祝賀，大家在新一年，搵到、剩到、身體好。總之，買W中W，買P唔會跑第四，買Q唔會淨係中對腳！
        
        
        第四場四班1200米。「快樂無窮」連續3場跑入Q，都係田草1200米，經常可在末段狂追好多個身位，而近仗佢先後與「夢幻十一」、「齊歡唱」、「幸運雄威」交過手，曾經試過輸小小返嚟（短頭和頭位），由此證明，目前狀態唔係冇得贏。今次識轉膊，唔跑三班賽，改戰四班A組場合，雖然要負重，用個吳嘉晉減十磅，其實好着數，只要人馬夾得嚟，有望勝回一仗。
        
        第六場四班1600米。「銀飛龍」連仗表現失望，唔通名大於實？阿棟唔係冇諗過！但見季初頭兩仗，跑得有紋有路，唔多似符碌之作，唔知當中因為咩事，而其中一個可能就係路程，所以，今場轉到1600米一試。但坦白講，加程唔係萬試萬靈，隻隻馬有唔同結果，我係信佢唔係水，先至會追多場，如果呢次都失望，咪搞阿叔嘞。
        
        第十場三級賽1400米。大摩喺今場華商華會出夠4匹馬，邊隻係真身？抑或齊齊出擊，各為其主，有時呢啲嘢好難講，之不過，當中「讚惑」肯加程改攻1400米，我就會畀大摩呢一着吸引到，因去季此駒在同程可在一班稱王，點會唔夠級數跑呢場，而就算用到柏寶，一樣火燒唔熱，6、7倍W，博得過。
               
        陳華棟