十足十金瑞勝利就手勁擊

猪拉多纳

　　今期賽事特別多騎師停賽，韋達、蔡明紹、柏寶、勞愛德等等，一共6位會唔會令到部分場合爆到七彩？！唔係冇咁嘅可能。

　　
　　睇過近期A欄谷草賽事，普遍有得追，中外檔馬更加唔輸蝕，不過，就好少大熱門贏得到。

重心場次　第6場　第三班（80-60分）1000米

　　「紅衣叻叻」季初孭個大肚腩出嚟跑，陣中冇走勢好正常。跑了兩場喺前仗強組賽事放入殿軍，多少已顯出狀態返緊嚟，而上賽忽然大敗則與賽事環境有關。今仗好位又路合，以佢嘅速度，如順利帶出，有權放返。

　　「幸運多寶」四升三班首仗幾乎贏埋，箇中難度唔細，按理回到此程仲好。「江山如畫」及「但求勝」，一對前置型馬，結合檔位形勢，前駒會較易掌握。

　　「祥禎」三班漸感阻力。「輕輕鬆鬆」此程不易再以慢放偷襲。「競駿寶寶」未必有前仗揀佢時嘅有利形勢。「金紫荊」三班此程必值一線，而上季初戴眼罩即勝A欄此程，小心歷史重演。

　　「都靈一號」一再排外檔不免留得後，但屢次展示強橫後勁，反映評分漸找到支持位，如果今場8檔唔係早段完全楔唔到，際遇稍比近仗好的話，已有贏面。「上海先鋒」衝勁短，谷草先會係出路，落埋五班已有優勢，係睇吓負重能力。

　　「嘻哈大少」純粹靠3檔賺及慳，料子就早已睇晒。「普渡馗」唔係健康有問題，五班可以打橫行。

　　「雄姿儷影」以贏馬時間及姿態，唔怕五升四班，只要臨場唔瘦，又唔係搏攰咗，可望保持成績。

　　「榮進蜜運」唔易穩定走勢，衝力亦唔強，轉到谷草短途或合適。「團隊精神」剛仗蝕跑法及形勢一樣湧得勁；「卡加精神」情況大致相同，兩駒都值得看重。「飛快威」8檔有點尷尬，要睇早段攞到咩位，如太後，處境便不利。

　　「十足十」四班此程未曾失三甲，實力一早引證到，而上賽係降班首仗，未必立即交出本身水準，加上，早段留得後，唔係最佳跑法，如果經上場後，喺進度及跑法均有改善，贏得。

　　「金瑞」及「勝利就手」，一對薛廐馬，彼此各有可取地方，但同樣有缺點。「勁擊」上賽已有貼，轉程冇理由唔跟多場。「智財」能力唔會叻，但再之前明明教到留後衝，只係上場特別差，可能係煙幕，忽然縮程，有變數。

　　「閃耀小子」初上一哩差啲贏埋，克服跳程要尊重，預佢今次4檔或再賺，三甲穩。「奄尖大少」及「白蹄烏」，少數同場季內識贏四班一哩的馬，賽績夠硬淨，正路之選。

　　「有盈有利」均速馬冇內檔之利，唔易跑得好。「浦東之威」9檔如早段被頂在外叠，隨時跑到冇影。

　　「開心歡樂」少馬喺早段走，2檔食正形勢，自領或守靚位都得。

　　「喜來仙子」仲有幾多改善空間，如出腳及脾性方面，但已經一連兩場識追，算係適應快，希望以目前進度夠用。

　　「勁有盈」太準，此程唔會比1000米失色，必揀。

　　「太極至尊」與「聚有盈」，欠冠軍相，好在跑法或排檔幫一把。「夢幻魔術」10檔唔易搵位匿，早段可能多耗力。

　　「享耆成」成日排好檔而冇P，暫時進度停留不前。「駿蹄飛」啱分又路合，轉倉首仗未必係熱身性質。

　　「威老虎」加程及轉場地，均會帶來正面影響，雖然排9檔係唔着數，不過，如早段較積極，畀佢守到較前位置，中置跑法或得到充分發揮。

　　「魅力星」1檔兼近績好，應該唔會跑到冇影。「威仔皇」又係連搏兩場，希望唔似季初要回一回。

　　「心中有程」肯放，今場隨時操控晒形勢。「精算縱橫」初出走勢及格，如果唔係塞車，應該會衝得好好多，熱完身，今次要小心。

　　「易搏贏」經1場回氣，兼且回到一哩，可能效果好番好多，話晒之前曾兩度入Q，近績吸引。「鵬力洋洋」上賽已指出狀態有起色，跑落唔算差，預期今仗可能進步。

　　「邦先生」及「靚到爆」，加分至此，多少有壓力，機會稍次。

　　「千杯不醉」此程性能不及1800米，恐怕追唔切。「愛睦善」太輕磅，跑法又機動，隨時再賺。

馬會賽馬節目主持　洪禮賢