奪金遇弱族坐正

猪拉多纳

　　沙田馬場草地B+2欄有樣好，賽道模式幾平均，唔係一味靠放，又唔係冇得追，賽駒可獲得公平競技。同時，頭馬又好少爆到亂晒籠，熱門馬通常交得幾準，所以，如果唔係突然有咩大變，呢啲環境幾有賭頭。至於今日邊個騎師信得過？白德民與郭立基係唔錯嘅選擇。

　　第六場第四班1400米。「奪金」前景未必係今場最好1匹，但進度唔會比幾匹質新馬失色。其實初出唔慢閘的話，根本已可上名，而上場跑殿軍輸得遠，係因為對手問題，但本身出閘好咗，以及加程後更具競爭性。今仗回到四班組別，邊度搵「芙蓉之寶」、「熊英雄」之輩，仲唔坐正。

　　自由萬歲不斷進步

　　第九場第三班1400米。「自由萬歲」一連4場1400米賽事跑得好，唔贏都有Q，呢匹5歲馬真係着晒火。雖然經過幾仗之後，已經加咗十幾分，由好輕磅變咗幾重磅，未必再咁着數。諗深一層，佢可能自己不斷增值，實力去到另一層次，所以，留在三班角逐仍有優勢。總之，一日未斷纜，賠率又唔係過熱的話，唔應該唔重視。

　　第十場第二班1400米。「新希望」又係好似前駒咁準，季內跑4場，取得2W1Q，之前贏完三班賽，一上二班再贏多場，而上賽與大超班馬串Q，再次證明佢自己喺呢班嘅地位。而呢場已經再冇眼中釘，相對佢嘅機會又會提升，值得熱捧。　陳華棟 資深評馬人