吳嘉晉爆42倍漸信良駒

猪拉多纳

馬少場合往往係爆冷溫床呢個見怪不怪嘅賽事現象，尋日又響第二場八隻馬場合出現，全場唯一牌仔坐騎「漸信良駒」，結果響一放到底情況下，爆出42倍最冷W，加上一面倒大熱「傲男」只跑梗頸四，同「天瞳」、「高分貝」構成QT，派彩相當和味。
  
漸信良駒一放到底爆大冷W，葉楚航（左）、吳嘉晉師徒一心。


師徒今季第三W


正所謂有人歡喜有人愁，吳嘉晉憑呢匹「漸信良駒」取得久違咗嘅頭馬，佢對上一場溫拿，已經數到十一月尾勝出徐廐「大把在手」，其實晉仔連埋呢場，加埋響十月份嘅「橫亨」同「夢仙」，亦只係同師傅葉楚航贏過三場，比起上季嘅鋒芒，真係相差一大截，且望今次2012首W，可以幫佢轉吓運。至於同場另一位主角韋達，策「傲男」再度上演漏閘事件，結果前段嘥力追趕，最終大熱又係付諸流水。