超勝路合屆勝「時」

猪拉多纳

　　霍廐「何方神聖」於元旦日尾場出戰二班1600米，臨場賠率雖愈賣愈冷，卻在安國倫胯下愈追愈勁，最終負於公認超班的「陽明飛飛」兩個半馬位得第二；剛周日此對人馬重來再戰同程，難怪閘前被捧成4.4倍次熱，可惜僅跑第五，延續霍廐馬今季極少打叠上名的「傳統」。

　　霍利時自上年12月4日勝出「聖迪達」後，至今直落十一個賽日未有頭馬進帳，目前暫以五冠十六亞十四季成績排於練馬師榜尾四，其中亞軍次數偏多，可見搏殺手風認真麻麻；明晚霍廐只出三駒，筆者睇好用王牌報名的「超勝」有機會替馬房打破悶局。

　　現已七歲的「超勝」，其戰鬥力無可否認正日漸下降，但幸好牠冇病冇痛，加上鬥心亦強，故此仍不時於谷草賽事跑近，正如季內此駒已於跑馬地出賽五次，並合共交出兩季一殿，而且落敗距離從未多於三個馬位。今仗牠續配勞愛德跑谷草1200米，牠於同程累積一冠三亞兩季兩殿外，此駒排一檔的成績亦穩定，對手非強隨時可重開勝門。

歐陽志恆