洪禮賢講馬:勁卒過河友瑩果連利福星一定快

猪拉多纳

        之前3期谷草C欄賽事，唔係話放頭馬着數晒，後上馬亦贏咗唔少，但內檔馬的確有天然優勢。

        3位騎師復出，點都分散吓外界注意力，賠率唔會側晒一邊。同時，柏蔡二人各有子彈，復出之夜料有W到手。


        「勁卒過河」係初出一役彈過，之後跑1場贏1場，由谷草贏到田草唔係易，所以，唔使太介意上賽早段賺到慢步速，總之，累積3W上三班跑，唔應該即刻停步。
        
        「友瑩果」前仗贏馬水準唔叻，但再之前1場入Q，可壓倒上二班有P「佳同」，冇可能分數在7字頭會盡。「日月暉華」三班長期捱打(12場冇P)。「一定快」上季尾喺接近70分可連續兩場在此程上名，升班咪當冇到。「星運俊爵」前仗初跑谷草，沿路二叠返嚟仍獲第五名，今仗2檔或可提升名次。「連利福星」12檔或焗留後，可能帶來正面幫助。


        「威水福星」初出贏同程，之後兩場跑輸有晒藉口（早段搶得緊要及出閘滯立），今賽前立心操足儲新鮮，如手法有效，配合埋1檔，可放到。
        
        「燈胆寶」跑到夠晒，肯返中程，因有個多月調校，大幅縮程或可應付。「大東海」喺五班長期會揀，因早已指出着數。「康莊大道」要博出唔出到閘，其他條件如評分、檔位、路程等，根本唔係問題。「八佰匹」睇唔透，唔係12檔，本有考慮價值，因擔心早段迫出三叠或以外。


        「跑得叻」四班谷草往績好，既然喺三四班田草1200米經常近，重返此程變主角，更重要係好位配合到跑法。
        
        「超勝」特登操住嚟等，立心儲嚟搏，手法夠實際。「妙不可言」按上賽沿路走勢，加程會好。「鑽飾彩虹」快馬唔多，9檔有機會切入二叠，處境若似上賽，便有入圍可能。「五星酒店」缺過課，有疑問。「百利旺」係上賽特別跑得差，唔知咩原因，其實再之前兩場唔係冇追勢。「大將軍」嘗試縮程未必係壞事。


        「聖樂邦」前仗三班同程，外檔令早段焗住留得後，出彎前又大力勒避，拉士仍湧到兩腳，結合剛賽守好位有P，若今仗2檔把握得好，前段咬靚位，有望在谷草破缺口。
        
        「大地王者」唔鍾意上場發揮，但睇今賽前準備，轉場唔係冇企圖，而分數比上季10次跑入前五名為低，如肯郁手，唔會有顧忌。「團隊精神」只擔心十幾日夠唔夠日子回氣。「多多昇」和「皇仁勁駒」，前駒近績太差，後駒8檔稍尷尬，只宜作配。


        「駿馬精英」係得前仗「外遊」成績差，餘下3場算係收貨。而肯在賽前繼續落力準備，對落班呢場唔係冇抱負。
        
        「雪米糍」10檔增加風險，因向來唔易穩定，關鍵喺早段留放及際遇。「叫關快」冇點做過嘢，初出竟入Q，完全係意料之外，今次操練加大力度，應會更出色。「十足十」係咪要「分手」，睇埋今場。「風火飛駒」大幅加程照贏，睇走勢，谷草一哩會仲易應付。


        最銳係得「勁有盈」及「江山如畫」，惜俱排外檔，略為擔心。「但求勝」一早冇藉口，唯一好處係此程或比1200米易捱。
        
        「首飾達寶」純粹因轉場先會考慮，因之前已指出，暫時進度未足以在田草爭勝。「駟馬難追」係2檔希望由頭賺到尾，但班次真係太大壓力。「常山鳳寶」唔在狀態冇法子。

        
        「新力多」和「超級精神」，近績秀麗，仲有內檔幫手，唔係搏攰咗，將會成為單挑之局。
        
        「私家路」之前3場三班賽，係得上場早段嘥多咗力先會輸遠啲，呢場位好又跑低半班，夠資格上名。「奄尖大少」2檔或繼續有上賽環境，有力爭三甲。「可愛人生」與「進勝福星」，外檔令演繹有難度，邊線配腳。


        「自由港」跑完上場隔得耐先復課，好在最後有大閘安排，亦唔係冇走勢，希望冇影響到進度，始終轉場級數高。
        
        「超群名駒」、「揀得正」與「歐洲駿馬」，爆一段跑法，遇慢步速未必驚，如出彎前喺外叠推進，有權克服。「威仔皇」例追一段，不過，成日有意外，有時亦唔連貫，限拖腳。