天子駕六分利郁手

猪拉多纳

　　今日沙田馬場10場草地泥地賽事，8場草地在B+2欄上演，兩場泥地則跑1200米。宏觀各場形勢，未必如表面上咁單純，有好幾場出馬唔滿額又如何，一樣唔易拆局，事關個別場次嘅熱門馬，睇落唔係咁穩陣，隨時仲會係連P都冇嗰類，真係要小心啲推敲！

　　第三場三班1400米。「豐衣足食」算係一匹幾冇運嘅馬，但又好少唔入前列，今季唯一一場冇表現係喺谷草，加個眼罩上去，未跑已經緊張到飛起，事後睇番，輸都好合理。其實，計佢上季到依家，喺1400米上名嘅賽事水準，邊有可能1W都攞唔到，偏偏個天玩佢，硬係搏極唔贏。今仗對手買少見少，希望直路打衝鋒時，會比上場順暢，有望擔正。

　　第四場五班1400米。「天子駕六」今季6場只得1次季軍，演出幾失望，比較起上季贏馬時評分，目前已有7分差距，唔會冇着數。可惜隻馬跑親田草成日排外檔，令早段發揮受到限制，加上，本身跑法又被動，往往出現追唔切鏡頭。今仗6檔起步，前段應該易啲搵位，假如都爾亦用心演繹，發揮出隻馬十成功力，或可突破。

　　第八場本地一級賽1200米。「天久」新鮮熱辣香港短途錦標盟主，上場在速度系列首關失望而回，全因1000米非所長，與實力及進度無關。今仗回到1200米，又用番柏寶，路程及配搭執番正晒，條件比剛仗大不相同，倘交回前仗水準，有力凱旋而回。