阳光王子转场着数

猪拉多纳

　　谷草C+3栏赛事，本来有利内档，但洒咗幾阵雨又会点？！外档可能唔蚀都未定，呢点要到时先再作定夺。但点都好，跑马落雨都係择使，放，又唔知啱唔啱；追，又担心追唔切。所以，咪嫌阿栋老气，今晚都係小注玩吓就算，不宜过分热情。

　　第二场五班1650米。「阳光王子」之前跑泥地，明显唔多啱脚法，败绩唔使理。净係计佢两场草地成绩，话晒係田草赛绩，攞过嚟谷草，点都赚啲级数。虽然，隻马未跑过谷草，好在有内档辅助，比较容易应付，总之未交代之马，一定把握机会。

　　第四场四班1000米。「万醒驹」第一次出赛已经好有走势，落场跑正一打仔格，如果当时直路唔係塞塞哋，睇末段衝劲，未必追唔到头马。高廐马初出已经有咁好表现，为数唔係多，算係异数，所以，更加要尊重上场入Q赛绩。呢次继续跑1000米，起码少样担心，如果场地慢冇影响赢面甚大。

　　第六场四班1650米。「雪米糍」上场有贴佢，嗰晚独赢2x3就係搵佢射「铁胆龙」，以为热热哋胜在稳健，点知输最後一步返嚟，但阿栋冇话因为只中「单」而怪罪，因为人马已经发挥出最好水準，唔够鬥唔係输畀「劲击」，可能係该驹骑师郭能特别辣啫！今场排外档及磅重，其实有小小担心，好在隻马近绩令人有信心，料可前列归来。

　　资深评马人 陈华栋