未赢感心急 交代唔等得

猪拉多纳

　　嚟到2月尾，差唔多可以叫做季尾阶段，不论练马师如何行军部署，季初以老马先行，还是季中着重新血接力，总之，最想嘅就係……赢马！亦即係所谓「交代」。而嚟到呢个阶段，廐内马匹如未有W到手，多多少少渐有压力、心急，当然，呢种压力只係无形，未必会影响练者与马主关係，从而萌生去意。但以心为心，边有练者唔想旗下马胜出。

　　正因为呢个概念，赛事嚟到现阶段，陆陆续续会有好多未W马胜出。至於係咪一定与「交代」有关？其实又唔会全部係，事关季初有部分马已赢够，令评分饱和，或体力搏到八八九九，点都会退落嚟，随之那些未有成绩嘅马，便有发力机会出现，呢个现象每季如是。

　　刚战7驹季内第1W

　　不过，近期的确不停出现交代到嘅马，好似刚刚谷草赛事，8场头马之中，除了铁马「劲有盈」之外，有7驹係季内第1W（再之前一期谷战亦有5匹），例子多到咁，唔认为係啱啱遇着刚刚啩？！所以，喺嚟紧嘅赛事，呢套思路方式，应要加入作为取捨赛驹时嘅因素。但要搞清楚一样嘢，呢种现象未喺沙田赛期成为气候，比例依然唔算多。

马会赛马节目主持 洪礼贤