持续天阴 随时有雨 搵定游水马冇坏

猪拉多纳

　　未食五月糉，寒衣咪入栊。近日天气乍暖还寒，一唔留神，真係好容易会病。有时晨早与晚间温差大，亦有机会因为着唔够衫，一个乞嗤，就咁踏上感冒之路，所以，奉劝大家近日要保重身体。

　　近期唔只天气时阴时晴，有时仲会有雨，虽然唔係话劲到好似开水喉咁落得好大，洒吓洒吓亦唔算细，如果今日继续有雨，场地不免受到影响，到时冇刨定擅跑变化地嘅马，可能愁爆。

　　当然，唔係一定有变化地根据之马，实会喺今日有运行，跑马呢家嘢，唔係简单成咁，望望赛绩就搞掂。隻马冇班、冇态、冇形势的话，见水识飞又如何。所以，假设今日有雨的话，笔者介绍3匹场地有利之马畀大家参考吓，希望佢哋可以趁地淋出击！

　　第四场「好辣椒」，好黏地入过Q两场，黏软地赢过1场，慢地性能点会差 ！ 而近绩唔靓，大家有眼见，但要知道，落班情况又要另计，何况，巫斯义上场输到冇影亦唔放手，可能呢场至係目标。第六场「信赖」，近仗成绩出色，8岁马难得状态处於高峰，加上变化地性能好，点会唔搏埋。最後，第七场「加州万里」，若然因为佢慢地冇问题，而劲敌「雄心威龙」冇咁叻的话，反先唔奇。