鬥爆末段高一线

猪拉多纳

　　第六场叁班1650米。「高一线」早年仲喺霍廐，曾经跑过一场谷草1200米，沿路楔喺埋便，唔算跑得差，假定场地性能冇问题，今场初次跑一哩未必唔胜任。而早喺1月退出嗰场，本已报跑此程，嚟紧周日亦有85分上限叁班1400米（高廐冇马报名），练者都係选择此程，虽有博博吓成分？！以此马级数而言，或可试出彩虹。

　　表面上，今场步速唔会快，对後追跑法嘅佢好不利，好在排11档，前中段攞位比较自主，如杜利莱唔係早段摆错晒位，喺出弯前先选择在外叠推进，直路鬥爆一段，应该唔多对手係佢嗰皮。

　　第七场叁班1200米。「吉利大师」上赛1400米跑错晒，一早上口摆前走，完全违反性能，败绩根本唔使理。输完休战两个幾月，期间工序冇甩漏，呢个月仲试够两大闸，藉以提醒隻马就快要跑（谷闸轻鬆跟返嚟第二）。若以之前同程入Q水準，输畀最近赢二班嘅「魔幻大师」唔多，佢自己喺叁班跑强项，赢面唔细。



马会赛马节目主持 洪礼贤